Сэтинньи 11 күнүгэр, Байанай ыйыгар сиэттэрэн, Уус-Алдан улууһун Мүрүтээҕи уолаттар гимназияларын 6 «б» кылааһын уоланнара Бэрт-Ууһун нэһилиэгэр баран кэллилэр. Уол оҕо айылҕаттан булчут-асчыт, булунас-талыгас.
Уоланнар уонна кинилэр куратордара Сыроватская Сардана Николаевна Сыырдаахха тимир ууһун Попов Илларион Егорович мастарыскыайыгар сырыттылар. Илларион Егорович уонна кини бииргэ үлэлиир доҕотторо уолаттарга саха быһаҕын, анньыытын саҕаланыаҕыттан бүтүөр диэри хайдах оҥороллорун кэпсээтилэр, көрдөрдүлэр. Уолаттар бэйэлэрэ тимири охсон көрдүлэр. Гимназияттан бастакы эһиги кэллигит диэн наһаа үөрдүлэр. “Оҕолор кэллиннэр, биирдиилээн да уолаттары каникуллар кэмнэригэр үөрэтэбит,» — диэтилэр. Түмүккэ Илларион Егорович гимназия директорыгар Федор Федорович Татариновка саха быһаҕын бэлэх уунна.
Ону тэҥэ Сыырдаах орто оскуолатын 6 кылааһын үөрэнээччилэрин кытта билистибит, эҕэрдэ музыкальнай номердары көрдөрдүбүт, оонньоотубут.
Ити курдук бириэмэни туһалаахтык атаардыбыт, элбэҕи биллибит-көрдүбүт, саҥа доҕоттордоннубут.
Николай Тарскай, Мүрүтээҕи уолаттар гимназияларын 6 «б» кылааһын старостата.