ЮНКОР БЭЛИЭТЭЭҺИННЭРЭ
От ыйын 8 күнэ. «Азия оҕолорун» норуоттар икки ардыларынааҕы VIII спортивнай оонньуулар бүппүттэрэ иккис күнэ. Икки нэдиэлэ устата оҕо пресс-киинигэр үлэлээбитим.
![](https://keskil14.ru/wp-content/uploads/2024/07/WhatsApp-Image-2024-07-08-at-22.45.58.jpeg)
олунньу, 2024 с., Майа, Мэҥэ Хаҥалас
Тус бэйэбэр олус түргэнник ааста. Олунньу ыйга «СААС» медиа форумҥа хамаандабынан кыайан баран, «Сосновый бор» лааҕырг олорон «МУУС УСТАР» ыччат фестивалын иһинэн «СААС» форумҥа кыттыбытым. Ол икки нэдиэлэлээх үлэм түмүгүнэн пресмс-кииҥҥэ кэлэр путевканы туппутум.
Пресс-киин үлэтэ, буоларын курдук, олус долгутуулаахтык, түргэнник уонна үчүгэй баҕайытык ааста диэхпин баҕарабын.
Үлэм туһунан кэпсээтэххэ, «Азия оҕолоро» VIII оонньууларыгар оҕо пресс-киинигэр үлэлээтим. Хамаандабар алтыа этибит. Бииргэ үөрэнэр доҕорбун Света Заровняевалыын иккиэн барбыппыт. Ыаллыы сытар Хадаар нэһилиэгиттэн Алена Ксенофонтова, Чурапчыттан Вилена Стручкова, Таатта улууһун Уолба нэһилиэгиттэн саамай эдэркээн үлэһиппит Алена Таппырова буоламмыт бу икки нэдиэлэ курдук Сардаана Анатольевна Матвеева салайааччылаах олуһун күүскэ үлэлээбиппит. Биир хамаанда буолан ким ханна тугу гынарын эрдэттэн кэпсэтэн, сорук туруорунан волейбол күрэхтэһиитин сырдаттыбыт. Мин үлэм туһунан кэпсээтэххэ, хамнаада үлэтин барытын толордум. Ыстатыйа суруйдум, интервью ыллым, видео монтаһын оҥордум. Күннээҕи былааны барытын толорон үлэлиир этим.
![](https://keskil14.ru/wp-content/uploads/2024/07/WhatsApp-Image-2024-07-08-at-22.48.26-1024x768.jpeg)
![](https://keskil14.ru/wp-content/uploads/2024/07/WhatsApp-Image-2024-07-08-at-22.48.28-1024x768.jpeg)
Буолуохтааҕын курдук, бастакы күннэргэ ыарахан этэ. Лааҕырга билсибит оҕолоргун кытта уопсайга олорор, сатаан тапсра, үлэлиир турукка киирэр бастаан син биир ыарахан. Дьэ сотору буолан баран күн аайы алтыһар юнкор доҕотторгун кытта бодоруһан бараҕын. Бу кэмҥэ мин «киһи барытыгар үөрэнэр» диэн этии ис хоһоонун олуһун үчүгэйдик билбитим.
![](https://keskil14.ru/wp-content/uploads/2024/07/WhatsApp-Image-2024-07-08-at-22.53.10-1024x683.jpeg)
Түмүгэр олус сэргэх, олоххо өйдөнөн хаалар олус үчүгэй күннэр аастылар диэхпин баҕарабын. Бастакы күннэргэ дьиэлиир санааттан атыны билбэт этим. Ол эрээри кэнники олох даҕаны дьиэбэр барыахпын баҕарбакка, стадиоҥҥа хонуохпун кытта баҕарбытым. Юнкор оҕолорбун кытта бииргэ үлэлээбит, иллэҥ кэммин тэҥҥэ атаарбыт күннэрбин, «Азия оҕолоро» норуоттар икки ардыларынааҕы оонньуулары сырдаппытым» диэн өрүү ахта-саныы сылдьыам. Уонна сотору кэминэн бэйэ-бэйэбитин булсуохпут диэн бигэтик эрэнэбин. Один континент — одна команда! диэн «Азия оҕолоро» оонньуулар девиһын бигэхтик өйдөөтүм.
50 юнкор оҕону бииргэ түмпүт, биир хамаанда оҥорон үлэлэппит, ол туһугар элбэх үлэни көрсүбүт, кыайыахтара диэн биһиэхэ эрэммит, итэҕэйбит, сылаас, үтүө санааларын анаабыт «Кэскил» оҕо бэчээтин кыһатыгар, кини дириэктэригэр Ольга Ивановна Семеноваҕа, бары куратордарбытыгар истиҥ, дириҥ махталбын тиэрдэбин.
Вадим КОЛЕСОВ, Х кылаас,
А.П. Илларионов аатынан Хайахсыт орто оскуолата, Чурапчы,
«Азия оҕолоро» оҕо пресс-киинин юнкора