Биһиги кэнчээри ыччат үрдүктүк тутар геройбут Владимир Владимирович Афанасьев 1973 сыллаахха балаҕан ыйын 22 күнүгэр Чурапчы оройуонун Хадаар нэһилиэгин Үрүҥ Күөл сэлиэнньэтигэр аламаҕай күн анныгар күн сирин көрбүтэ. Кини олоҕо кырдьыктаах саха киһитин, дойдутугар бэриниилээх сүрэхтээх бухатыыр үйэтинэн суруллубута.
1980 сыллаахха оскуолаҕа маҥнайгы кылааска үктэммитэ, 1988 сыллаахха Хадаар аҕыс кылаастаах оскуолатын ситиһиилээхтик түмүктээбитэ.
Кыра эрдэҕиттэн чэгиэн-чэбдик, чөл олоҕу тутуһар, спорт араас көрүҥнэригэр дьоҕурдааҕа. Волейбол, баскетбол, чэпчэки атлетика көрүҥнэргэ нэһилиэгин, оскуолатын аатын ааттатар ситиһиилэрдээҕэ. Үөрэҕэр кыһамньылааҕа, оскуола олоҕор куруук инники күөҥҥэ сылдьан, көхтөөхтүк кыттара.
1995 сыллаахха олоҕун аргыһын көрсөн, Марияна Егоровналыын ыал буолбута. Кыыстаах уол оҕоломмуттара.
Владимир волейболга сөбүлээн оонньуура. Саха сирин волейбол күрэҕэр үрдүк лигаҕа иккитэ призердаабыта. Бултуура, айылҕаҕа сылдьара.
Төрөөбүт дойдутугар бэриниилээх, күүстээх, хорсун санаалаах, дьулуурдаах буолан, анал байыаннай дьайыыларга дойдутун көмүскүү барбыта. Илиҥҥи байыаннай уокурук 68-с армейскай корпуһун 39-с туспа гвардейскай мотострелковай этэрээтигэр штурмовигынан сулууспалаабыта. Кини хорсуннук, бэйэтин харыстаммакка, олоҕун толук ууран сэриилэспитэ.
2024 сыллаахха муус устар 3 күнүгэр байыаннай сорудаҕы толоро сылдьан, ДНР Марьинскай оройуонун Новомихайловка нэһилиэнньэлээх пуунугар 7-с лесополосаны үс суукка тухары турууласпыта. Үс күннээх түүн ытыалаһ сытар киһиэхэ снаряд түһэн, ыараханнык бааһыран, олоҕо быстыбыта.
Владимир Владимирович Афанасьев хорсунун, бэриниилээх буолуутун иһин мэтээлинэн наҕараадаламмыта. Кини үйэлээх аата биһиги сүрэхпитигэр куруук тыыннаах буолуоҕа. Кини аата үйэлэргэ умнуллубат үтүө аат.
Ахтыылартан түмэн бэлэмнээтэ Алена Ксенофонтова, IX кылаас,
С.Д. Флегонтов аатынан Хадаар орто оскуолата, Чурапчы