Муус устар 8 күнүгэр Уус Алдан улууһун Бороҕонугар В.В. Алексеев аатынан Мүрүтээҕи уолаттар гимназияларыгар үөрэнээччилэргэ улуустааҕы математика олимпиадата буолар. Бу олимпиаданы ыытыы миэхэ олус суолталаах. Ол туһунан хаста да суруйан турабын. Бастатан туран, математикаҕа талааннаах оҕолору кытта билсэбит, кинилэргэ РФ үрдүк үөрэҕин тэрилтэлэригэр үөрэххэ тутуу быраабылаларын билиһиннэрэбит уонна дойду киин куораттарыгар сыаллаах үөрэтиигэ кимнээх кандидат буолалларын барыллаан быһаарабыт. Олимпиада 10 – 11 кылаастар үөрэнээччилэригэр анаан ыытыллар. Россия киин куораттарын университеттарыттан, институттарыттан преподаватель-бэрэстэбиитэллэр баар буолуохтара, кинилэр онлайн киэбинэн кыттарга бэлэмнэрин биллэрдилэр. Онон, оҕолорго сырдатар-иһитиннэрэр туһалаах информация элбэх буолуоҕа. Олимпиада түмүгүнэн бастыҥ көрдөрүүлээхтэр босхо үөрэххэ киирэллэригэр, босхо устудьуоннар уопсайдарыгар олороллоругар көмөлөһөбүт.
Уус Алдан улууһун оҕолоругар бу ыытыллар олимпиада бэйэлэрин кыахтарын көрдөрөллөрүгэр, Россия киин улуустарыгар үөрэнэр баҕаларын олоххо киллэрэллэригэр туһалаах дии саныыбын. Ол иһин мин, “Капитал” тутуу хампаанньатын салайааччыта буоламмын, төрөөбүт дойдум ыччата үөрэхтээх буоларыгар үөрэ-көтө кылааппын киллэрэбин. Кинилэр үөрэхтэрин бүтэрэн төрөөбүт-үөскээбит өрөспүүбүлүкэлэригэр, улуустарыгар кэлэн, сайдыыны саҕыахтарыгар олус эрэллээхпин.
Историяттан кэпсээтэххэ, бастаан саҕалыырбытыгар Танда эрэ оҕолоругар анаан оҥорбуппут, онтон Танда үрэх сүнньүнэн олохсуйбут нэһилиэктэр оҕолоругар диэн буолбута, онтон Тандаттан уонна Танда үрэҕиттэн төрүттээхтэргэ тэриллибитэ. Быйыл Уус Алдан улууһа уонна Уус Алдантан төрүттээх оҕолорго анаан ыытабыт диэн быһаардыбыт. 2014 сылтан саҕалаан ыытыллар олимпиада түмүгүнэн элбэх оҕо үөрэххэ киирбитэ. Билигин кинилэр идэлэрин баһылаан, олус үчүгэйдик үлэлии сылдьаллар. Мин онтон үөрэбин. Куруук сибээскэ бааллар. Ол аата – олимпиада түмүгэ баар.
Олимпиаданы сүрүн тэрийээччинэн Идэҕэ бэлэмнээһин киинэ буолар, салайааччыта Иван Гаврильевич Неустроев. Кини киин куораттарга Саха сирин оҕолорун үөрэтиигэ департамеҥҥа уһуннук, ситиһиилээхтик үлэлээбитэ. Олус уопуттаах исписэлиис. Биһигини көҕүлээһиммитин улуустааҕы үөрэх управлениета өйүүр, онон сүрүн үлэтин бэйэтэ ылынна, салайааччыта Степан Моисеевич Литвинцев.
Евгений Кривошапкин