Балаҕан ыйын 21 күнүгэр Лөгөй лиссиэй-интэринээккэ 6 төгүлүн ыытыллар «Күһүҥҥү сулус» диэн уоттаах күөстээх, ырыа-тойук, үҥкүү-битии аргыстаах умнуллубат киэһэни улуус үөрэнээччилэригэр анаан ыытыллан, Мүрү-1, Мүрү-2, Уһун-Күөл, Курбуһах, Дүпсүн, Баатаҕай, Найахы, Тумул, Чэриктэй, Тулуна, Суотту, Хомустаах оскуолаларыттан хаары хаар диэбэккэ 300 оҕо сынньанан, дуоһуйан астынан бардылар. Бу бырайыак үөрэнээччилэр эрэ буолбакка, бөһүөлэк олохтоохторо, биһиги лиссиэйбит выпусниктара куруутун ахтан-санаан ааһар кэтэһиилээх күннэрэ буолар.
Бырайыак ааптара — 2024 сылтан тохтобула суох ыытар Любовь Евгеньевна Петухова, 2024 с. выпуск салайааччыта.
Лөгөй лиссиэй-интэринээтин омук тылын учуутала уонна быйыл 10 а, б кылаас үөрэнээччилэрин кылаас салайааччыларын Надежда Егоровна Бурнашеваны, Алексей Алексеевич Бережневы кытта тэрийэн ыыттылар. Түгэнинэн туһанан, улахан махталбытын тиэрдэбит, куруук оҕолор идеяларын, бырайыактарын өйүүр, олоххо киллэрэргэ күүс-көмө буолар, лиссиэйбит дириэктэригэр Михаил Петрович Пуховка!
Тэрээһиммит биир саамай күүтүлээх чааһа ырыа доҕуһуоллаах ыалдьыттар буолаллар. Ол курдук «Күһүҥҥү сулус» Open Air-га үҥкүү киэһээтин аныгы ыччат сөбулээн истэр, ырыатынан кирэгэппит DJ MAKO, алыптаах ырыа-үҥкүү киэһээтин иилээн саҕалаан ыыппыт MC KolyaOll, эдэр кэскиллээх ырыаһыт Асик Сокорутов уонна тэрээһиммит саамай кэтэһиилээх чаҕылхай сулуһа JEADA буолла.
Сылын аайы бу бырайыак таһыма үрдээн, интириэһинэй буолан оҕолор саамай күүтэр тэрээһиннэрэ буолара кэрэхсэбиллээх!
Мин тус бэйэм биһиги Лөгөйбүт лиссиэйэ үрдук таһымнаах тэрээһиннэри ыытарыттан олус үөрэбин, астынабын! Аны саас 7 төгүлүн ыытыллар үөрэх дьылын түмүктүүр open air-га барыгытын ыҥырабыт уонна күүтэбит!
Янис СЫСОЛЯТИН, SiTiM LegMedia юнкора