Эмис оскуолатын тохсус кылааһыгар төһө да алта эрэ үөрэнээччи үөрэннэр, бары араас хайысханан дьоҕурдарын сайыннаран, кэккэ ситиһиилээхтэр. Ким эрэ үөрэх туйгуна, ким эрэ дуобатчыт, ким эрэ сүүрүк, ким волейболист, ким эрэ ырыаһыт.
Тохсунньу 14-15 күннэригэр Чурапчы улууһугар Николай Федоров чиэһигэр ыытыллыбыт волейболга өрөспүүбүлүкэ турнирыгар биһиги оскуолаттан Милена Ларионова улуус хамаандатыгар киирэн, 20 хамаанданы кытта күөн көрсөн, үһүс миэстэни ылан кэллилэр.
Оттон тохсунньу 19-21 күннэригэр Дьокуускайга «Өрөгөй» уораҕайга 2006-2009 сыл төрүөх оҕолорго Саха сиригэр чэпчэки атлетикаҕа бастыыр иһин күрэхтэһиигэ 3000 м сүүрүүгэ Эльдар Уваров иккис миэстэни ылан үөрүүтэ үрдээтэ. Амма улууһуттан 13 оҕо кыттан, бары холбоон 14 мэтээли аҕаллылар.
Миленалаах Эльдар кыра кылаастан СӨ Үөрэҕириитин туйгуна Мария Васильевна Неустроева салайыытынан спорка уһуйуллан, сатабылларын үрдэтэллэр. Ситиһиилэрин быйыл оскуолабыт 100 сыллаах үбүлүөйүгэр аныыллар.
«Кэскил» медиакиин, Эмис ОО, Амма улууһа.