Улуу Кыайыы 80 сылын көрсө Н.Е. Иванов аатынан Бөтүҥ орто агрооскуолатыгар “Өйдүүбүт, сүгүрүйэбит, ытыктыыбыт” диэн кынат тылларынан кылаастар ыккардыларыгар Кыайыы бырайыагын акциятыгар көхтөөхтүк кытталлар.
Нэһилиэкпитигэр тэрилтэлэринэн Улуу Кыайыыны уруйдаан-айхаллаан күн ахсын күүрээннээх үлэ, ис хоһоонноох тэрээһиннэр,араас чинчийиилэр, дакылааттар, презентациялар, биктэриинэлэр утуу-субуу буола тураллар.
Ол курдук, биһиги оскуолабытыгар үөрэнээччилэр сэриигэ сылдьыбыт эһэлэрин, эбэлэрин, тыыл уонна үлэ бэтэрээннэрин туһунан презентация оҥорон, уруһуй уруогар уруһуйдаан көрдөрдүлэр, кэпсээтилэр. «Герои нашей Победы» диэн ааттаан мэтириэттэри тутан, хаартыскаҕа түһэн, кылаас ааннарыгар иилэн киэргэттилэр. Оҕолор бары кэриэтэ эһэлэрин, эбэлэрин, аймахтарын «Бессмертный полк» кэккэтигэр киллэрэн ааттарын үйэтиттилэр.
Онтон кылаастарынан хор толоруутугар күрэх буолла. Бастакы ырыа П. Одорусов тылларыгар уонна Н. Бойлохов дьүрүлүгэр «Тыыннаахтар умнубат сыллара», иккискэ—талан ылбыт ырыаларын доргуччу ыллаатылар, күөн күрэхтэстилэр. Түмүккэ Гран-при хаһаайыннарынан IV кылаас буолуон буолла (салайааччы М.К. Дьяконова). I бочуоттаах миэстэни VIII кылаас үөрэнээччилэрэ (салайааччы К.Д. Чирикова) ылан, нэһилиэк параатыгар кыттар чиэскэ тигистилэр.
Улуу Кыайыыга анаммыт «Окно Победы» акцияҕа оҕолор бары түннүк киэргэттилэр. «Движение первых» бэйэни салайыныы оҕолоро фотозона оҥордулар (салайааччы В.Д. Мартынова).
«Уроки памяти» төрөппүт кыттыылаах кылаас чаастара буоллулар. История учууталлара Наталья Иосифовна Новикова уонна Егор Трофимович Никифоров «Диктант Победы» диэн норуоттар икки ардыларынааҕы историческай истэн суруйууну XI кылаас үөрэнээччилэригэр тэрийдилэр.
Салгыы кыраһыабай көстүүлээх фотозонаҕа оҕолор хордуон дьааһыктарга бырайыак оҥорон көмүскээтилэр. Ол курдук, I кылаастар «Учителя фронтовики», II кылаастар «Ордена, медали», III кылаастар «Фронты», IV кылаастар «Военная битва», V кылаастар «Военные песни», VI кылаастар «Памятники Победы», VII кылаастар «Города трудовой доблести», VIII кылаастар «Дети войны», IX кылаастар «Георгиевская лента»,«Флаг Победы», X кылаастар «Города Герои» уонна XI кылаастар «Парад Победы» тиэмэлэри кэпсээтилэр. Оҕолор бары олус көхтөөхтүк кытыннылар, элбэҕи биллилэр, хаартыскаҕа түстүлэр. Бу түмүгүнэн оҥоһуллубут үлэ оскуолабыт биир муннугар эбии кэрэ быыстапка буолла.
Ону тэҥэ, VI кылаас кыргыттара «Мин мантан сэриигэ барбытым кыракый балаҕан дьиэбиттэн» диэн Иван Артамонов хоһоонугар олоҕуран композиция оҥорбуттарын кэпсээтилэр. Салайааччылара үлэ уруогун учуутала Туяра Самсонова. Туттуллубут техникалара сымыыт угуллар хордуона, ПВА клей, медицинскэй баата, борубулуоха,аска аналлаах фольга, акриловай кырааска.
Актовай саалаҕа кыра уонна орто сүһүөх оҕолоро Тимофей Сметанин айымньытынан Дмитрий Кольцов «Рядовой Чээрин» диэн киинэтин көрдүлэр. Ырыттылар, кэпсэттилэр.
Улуу бырааһынньыкка киэргэнэн, бэлэмнэнэн, субуотунньук тэрийэн ыраастанныбыт, хомуннубут, өрө тардынныбыт. Орто сүһүөх оҕолоро тыыл, үлэ бэтэрээннэригэр уонна сэрии сылларын оҕолоругар Тимурдуу үлэҕэ сырыттылар.
«Платформа» Медиа киин чилиэннэрэ, VII кылаас үөрэнээччилэрэ Виолетта Иванова уонна Латифа Маркова радиоузелга сэрии хронологиятын, история чахчыларын нэдиэлэ аайы сырдаттылар, иһитиннэрдилэр.
Салгыы өйдүү-саныы сылдьарбытыгар атын бырайыактар күнтэн күн эбиллэн иһиэхтэрэ. Чинчийии үлэлэр салҕаналлар. Ким да умнуллубат, туох да умнуллубат!
Юрьяна Гурьева, Виолетта Иванова,
«Платформа» Медиа киин чилиэннэрэ, Бөтүҥ, Амма.