Дьааҥы улууһун Табалаах нэһилиэгэр Кыайыы Знамятын нэһилиэнньэ бүттүүн күргүөмнээхтик турунан, үрдүк таһымнаахтык көрүстэ. Знамяны Адыаччыттан нэһилиэгин баһылыга Валерий Стручков үрдүкү кылаас уолаттарын кытта арыаллаан аҕаллылар.
Знамяны олохтоох баһаарынай чаас уонна олохтоох ититэр ситим үлэһиттэрэ сэлэлии туран көрүстүлэр. Саалаҕа оскуола оҕотуттан саҕалаан, бары тэрилтэлэр үлэһиттэрэ уонна олохтоохтор эрдэттэн бэлэмнэнэн өрө күүрүүлээх быһыыга-майгыга көрүстүлэр.
Знамяны биһиги нэһилиэкпитигэр олорон ааспыт фронтовик-буойун Гаврил Иннокентьевич Семенов уола Г.Г.Семенов тутан, Владивостоктааҕы муоратааҕы байыаннай чаас матроһа Петр Слепцов уонна Хабаровскайдааҕы автомобильнай байыаннай чааһын стрелога Денис Ефимов арыаллаан, бочуотунай эргиири оҥорбуттара дьоһун көстүү буолла.
Бу түгэни долгуйа өр күүппүт ытык киһибит А.С.Колосов Кыайыы Знамятын тэниччи тардан, суругун ааҕан баран, сөһүргэстээн олорон ис санаатыттан махталын биллэрэн, сылаастык сыллаан ылбыта тэрээһин долгутуутун өссө күүһүртэ.
Бу бырааһынньык үөрүүлээх түгэнигэр олохтоох дьаһалтатын аатыттан буойун Г.И. Семенов оҕолоро, сиэннэрэ, хос сиэннэрэ тыыннаах сибэкки дьөрбөтүн үлэ, тыыл бэтэрээннэригэр, сэрии сылын оҕолоругар туттардылар. Эҕэрдэ тылы олохтоох дьаһалта баһылыга Анна Рожина эппитин кэннэ, бэтэрээннэр ааттарыттан 85 саастаах Мария Васильевна Атласова сэрии сылларынааҕы үлэ-хамнас туһунан кылгас ахтыыны оҥордо, 11 кылаас үөрэнээччитэ Мичилина Эверстова буойун эһэтин туһунан иһитиннэрии оҥордо.
Тэрээһиҥҥэ Табалаах ыччата Валентин Стручков тылларыгар уонна мелодиятыгар эр дьон ансаамбыла “Биэс уолаттарым” ырыаны толорууларын мустубут дьон долгуйа иһиттэ. Ону таһынан, уолаттарга аналлаах “Кыайыыны уруйдуубун” күрэх кыттыылаахтара хоһоонунан эҕэрдэлэрин тиэртилэр.
Улуу Кыайыы 75 сылын көрсө Знамяны көрсүһүү биир долгутуулаах түгэнинэн Кыайыыны аҕалбыттар ааттарыгар биир мүнүүтэлээх сүгүрүйүү буолла. Маннык өрөгөйдөөх түһүлгэҕэ мустубут 250-тан тахса киһи Илья Чаҕылҕан тылыгар “Хайыһар” ырыатын хорунан ыллаан ньиргиттэ.
Бу тэрээһиҥҥэ хас биирдии киһи эппиэтинэстээхтик сыһыаннаһан, анал пуорманы кэтэн кыттыбыта Улуу Кыайыыга ытыктабылын, сүгүрүйүүтүн бэлиэтинэн буолла. Онон табалаахтар оройуон эстафетатын ЭКЦ художественнай салайааччыта Саргылана Потапова сценарийынан дьоһуннук түмүктээн ыыппыппыт, барыбыт патриотическай санаатын күүһүртэ. Тэрээһини ЭКЦ үлэһитэ Светлана Слепцова уонна оскуола эдэр техник-программиһа Егор Хабаров дуорааннаах куоластарынан итэҕэтиилээхтик саҥаран тиэрдибиттэрэ хас биирдии киһини долгутуон долгутта.
Бу күннээҕи тэрээһин манан эрэ бүппэтэ. Салгыы маҥнайгы кылаастан уон биирис кылааска диэри оҕолорго “Смотр песни и строя” үгэс буолбут күрэхтэрэ көхтөөхтүк ыытылынна.
Ааптар: Ия Стручкова, учуутал.