Билсиҥ, саҥа инстаграм рубрика – «Бу — интэриэһинэй»
Саҥа рубрикаҕа биһиги ааҕааччыларбыт — оҕолорбут тулалыыр эйгэни сэргээн, сэҥээрэн, кэтээн көрбүт уопуттарын, үлэлэрин туһунан кэпсиэхтэрэ,
Оттон бүгүн Тая Корякина @NadInKo улиткалар хайдах үөскүүллэрин туһунан бэйэтэ кэтээн көрбүт үлэтин билиһинэрэр. Кини Г.С. Донской аатынан 2 №-дээх Бүлүү орто оскуолатын V «А» кылааһын үөрэнээччитэ.
Таяны @kolokolchik_chuoraanchik ааҕааччылара билэҕит. Кини чоппуускалары, кустары сымыыттан таһаарбытын туһунан кэпсээн турардаах. Чоппуускалара тахсыбытын кэнниттэн, Тая аны сымыыттыан сөптөөх улиткалары хантан булабын диэн толкуйга түспүт. Төрөппүттэрин кытта ватсапка статуска улиткаҕа наадыйалларын туһунан биллэрии таһаарбыттар. Өр өтөр буолбатах @aleksandra_tutukarova сымыыттыырга саамай сөптөөх 1 саастаах улиткалар баалларын туһунан биллэрбит. Тая өссө биир чинчийэр, кэтээн көрөр үлэтэ сатанан эрэриттэн олус диэн үөрбүт. Дьэ уонна Тая гуугултан хасыһан, улиткалар туһунан үөрэтэн барбыт. Улитка «беременнай» буоллаҕына хайдах, туга уларыйарын, кырачаан улиткалар хас күнүнэн үөскүүллэрин, төһө өр буолан баран тахсалларын — барытын хасыһан аахпыт. Уликаларын күн аайы кэтээн көрбүт. Сууккаҕа баар 24 чаастан биир да чааһы куоттарбакка кэтээбит. Дьэ, кырачаан улиткалар күн сирин көрөр дьылҕаларын быһаарар кэтэһиилээх күн үүммүт. Тая ол сарсыарда ВПР суруйа барыахтаах. Онон ити күн икки бүк эппиэтинэстээх буолбут. Кырачаан улиткалар үөскүүр процесстара өр буолар эбит. Дьиэлээхтэр көрбүттэринэн, 30 мүнүүтэ, иккистээн чаастан ордук. Сиһилии бу ссылканан киирэн көр:
https://www.instagram.com/p/CFdmAVen73M/?igshid=19obfot2ths0g
Аны хонук ааҕыыта. Ити суолталаах күн кэнниттэн улитка хас хонугунан сымыыттыырый? Ону куоттарбат туһугар Тая Корякина кэтээн, чинчийэн көрөр үлэтин иккис түһүмэҕэ саҕаламмыт.
Сэтинньи 7 күнүгэр сарсыарда турбуттара бастакы улиткалар хайыы үйэ сымыыттаан бэлэм сытар. Тая контейнер була охсон, тэрээпкэ тэлгээн сымыыттары онно көһөрбүт. Аны сымыыттарын тэһэн, кырачаан улиткалар күн сирин көрөллөрүн кэтэһэр үлэ үһүс түһүмэҕэ саҕаламмыт. Тахсыбыттарын аны туспа иһиккэ салаат сэбирдэҕин тэлгээн онно көһөртөөбүт.
Иккис ийэ улитка сэтинньи 10 күнүгэр сымыыттаан эрэрин түбэһэ көрбүт. Видеоҕа устубут. Ити күнүс 13 ч. 10 мүн. саҕалаабыт эбит. Бу улитка сымыыттарын Тая атын иһиккэ көһөртүү олорон аахпыта — 183 устуука сымыыт!!! Дьэ, дьикти! Итиччэ элбэҕи хайдах батара сылдьыбыта буолуой раковинатыгар?…
Сиһилии манна киирэн көрүн:
Көннөрү көрдөххө, сымыыттар сыталлар да сыталлар, онтон видеоҕа тахса сатааннар хамсыыллара сүрдээх. Ити салаат сэбирдэҕэр күүлэйдии сылдьааччылар 4 хонуктаах улиткалар. Түргэн баҕайытык улааталлар эбит.
Тая Корякина чинчийэр, кэтээн көрөр үлэтэ дьэ, кырдьык интэриэһинэй. Улиткалар хайдах үөскээн күн сирин көрөллөрүн туһунан кэпсиир туспа энциклопедия.
Эһиги эмиэ кэтээн көрбүт үлэҕитин ыытыаххытыҥ сөп. Сонун, сэргэх үлэҕитин биир саастыылаахтаргытыгар кэпсээҥ, тарҕатыҥ.