Кеша Алексеев аатын сүгэр Хаптаҕай орто оскуолатыгар уһуннук үлэлээбит РФ үөрэҕириитин туйгуна, Саха Өрөспүүбүлүкэтин үтүөлээх учуутала, учууталлар Учууталлара Евдокия Николаевна Назарова сырдык аатыгар анаммыт «Олоххо, оҕоҕо тапталынан/Большое сердце» ахтыы-кинигэтэ сурэхтэниитэ олус истиҥник, долгутуулаахтык буолан ааста.
Кинигэ сүрэхтэниитигэр оскуола учууталлара, Хаптаҕай, Павловскай оскуолаларыгар үөрэппит оҕолоро, кэллиэгэлэрэ, истиҥ дьүөгэлэрэ уонна Евдокия Николаевна кэргэнэ, СР үөрэҕириитин үтүөлээх үлэһитэ Павел Григорьевич Морохоев кыттыыны ыллылар. Ахтыы күн оскуолабыт нуучча тылын уонна литературатын кабинетыгар Евдокия Николаевна аатын иҥэриититтэн саҕаланна.
Евдокия Николаевна 1978-1994 сылларга биһиги оскуолабытыгар үрдүк таһаарыылаахтык үлэлээбитэ, саҥа кабинет тэрийбитэ, кабинет ис хоһоонун байытыыга элбэх кылаатын киллэрбитэ. Кабинеты наставнигын илиититтэн Хаптаҕай оскуолатын нуучча тылын литературатын учуутала Майя Гаврильевна Самсонова тутан хаалбыта уонна салгыы кабинет улууска бастыҥ кабинет буоларыгар коллегатын кытары Кокорева Светлана Анатольевналыын үлэлии-хамсыы сылдьаллар.
Оскуола директора Ирина Владимировна Кычкина кабинекка Е.Н. Назарова аатын иҥэрэр бирикээһи ааҕан П.Г. Морохоев туттарда. Салгыы кинигэ ис тутулун библиотекарь Людмила Николаевна Назарова билсиһиннэрдэ, салгыы кинигэ суруллуутун Павел Григорьевич кэпсээтэ.
Кинигэҕэ Евдокия Николаевна күн сирин көрүөҕүттэн олоҕун Павел Григорьевич толору, сүрдээх ис хоһоонноохтук арыйбыт, салгыы аймахтарын, бииргэ оскуолаҕа, университекка үөрэммиттэрин, кэллиэгэлэрин, чугас дьүөгэлэрин, үөрэнээччилэрин, төрөппүттэрин, дьиэ кэргэнин — уолаттарын Анатолий, Борис, кийииттэрин Александра, Вера, сиэттэрин ахтыылара саас-сааһынан түһүмэҕинэн киирбиттэр.
Олус долгутуулаах ахтыыны учуутал дьүөгэлэрэ Д.Д. Ларионова, Р.Г. Захарова, Н.Н. Яковлева, А.И. Кононова «Дружба длиною 40 лет» диэн биир-биир аҕыннылар, ахтар-саныыр учууталбыт –Павловскайга үөрэппит оҕолоро Мария Необутова, Надя Кривогорницына, Надя Слободчикова, Люда Романова, Проня Макаров, Василиса Сивцева, Хаптаҕай оскуолатыгар үөрэппит оҕото, учууталын туйаҕын хатарбыт үөрэнээччитэ Мария Кривошапкина оҥордулар. Наставник учууталларын туһунан М.Г. Самсонова, С.А. Кокорева киниттэн элбэххэ үөрэммиттэрин, учуутал быһыытынан үүнэллэригэр олук уурбутун эттилэр.
«Учитель милостью божьей» ахтыы киэһэтэ долгутуулаахтык, истиҥник, Улахан учуутал, кэрэ киһи аата ааттана туруо, маннык үтрүө-мааны киһи туһунан төһө баҕарар кэпсиэххэ-ахтыахха сөп диэн түмүктэннэ. Салгыы бу киэһэ кинигэ туппут дьон бу түүн биир тыынынан аахтыбыт, Евдокия Николаевна барахсан туһунан диэн үллэһиннибит.
Нина ЯКОВЛЕВА, «Кустук» пресс-киин, Хаптаҕай орто оскуолата.