Оскуолабытыгар хас нэдиэлэ аайы ыытыллар сахалыы чэппиэр Ийэ тыл, сурук-бичик күнүгэр ананан ыытылынна. Ийэ тылбыт күнүгэр аналлаах сиэри-туому саха тылын, литэрэтиирэтин учуутала Галина Николаевна Бандерова алгыстаах алаадьынан, саламаатынан күндүлээн көрүстэ, тэрээһини иилээн-саҕалаан ыытта.
Учууталбыт үөрэнээччилэргэ анаан бу күн хайдах төрүттэммитин, төрөөбүт тылбыт суолтатын туһунан сырдатта. Оскуолабыт дириэктэрэ Пётр Петрович Тарасов эҕэрдэтин эттэ. Үрдүкү кылаас үөрэнээччилэрэ Дайаана Мишкина, Люба Сергеева сахалартан бастакы тыл үөрэхтээҕэ, лингвист-учуонай С.А. Новгородов «Төрөөбүт соругум» хоһоонун ааҕан иһитиннэрдилэр. Оскуолабыт учууталларын «Далбарай» фольклорнай бөлөҕө сахалыы инструменнарынан доҕуһуоллаан, эҕэрдэ ырыаларын толордулар.
Түмүккэ, Галина Николаевна: «Биһиги сахабыт тыла олус баай, уон араас өҥүнэн күлүмүрдүүр, араас хамсаныыны дьүһүйэр, ойуулуур сүдү күүстээх. Төрөөбүт тылгытынан киэн туттуҥ, харыстааҥ, сайыннарыҥ», – диэн баҕа санаатын эттэ.
Тэрээһиммитин бары бииргэ оһуохайынан түмүктээтибит. Оһуохайы 4-с кылаас үөрэнээччитэ Денис Давыдов, 7-с кылаас үөрэнээччитэ Эрсан Фёдоров, 11-с кылаас үөрэнээччитэ Люба Сергеева уонна төрүт култуура учуутала Елена Семеновна Харитонова таһаардылар, улахан түһүлгэни төрүттээтилэр. Бу курдук Ийэ тылбытыгар анаммыт тэрээһин олус интэриэһинэйдик ааста.
Айна БАНДЕРОВА, VII кылаас,
С. Д. Флегонтов аатынан Хадаар орто оскуолата, Чурапчы