Биһиги нэһилиэк суруналыыс идэлээх дьоно түмсэн, суруйааччы, суруналыыс, тылбаасчыт Георгий Иванович Борисов аатынан «Айар үлэҕэ ситиһиитин иһин» диэн анал стипендияны М.Е. Васильева аатынан 2-с Малдьаҕар орто оскуолатын суруйар дьоҕурдаах, суруналыыстыка эйгэтигэр кэккэ ситиһиилэрдээх выпускнигар аныыбыт.
Инники сылларга Винокурова Васена, Иванова Уйгулаана, Пудова Айыына, Иванова Лора, Лукин Ваня стипендиат буолбуттара.
Биһиги ассоциациябытыттан суруналыыс идэлээх, билигин суруналыыстыка эйгэтигэр айымньылаахтык үлэлии сылдьар Трофимова М.В., Ефремова А.В., Кононов В.А., Николаева Т.И., Громова Н.П. быйыл сүбэлэһэн баран, икки стипендиаты наҕараадалаатыбыт. Ол курдук икки стипендиат кыргыттар Лилия Федорова, Саша Львова «Сэрии оҕолоро», «Билии, сайдыы сарыала» кинигэлэри бэчээттээһиҥҥэ үлэлэспиттэрэ, хаһыакка суруйуулара, хаартыска күрэҕэр кыттыылара үгүс, научнай-чинчийэр конференцияларга кинигэлэрбит туһунан дакылааттарынан кыттан, Арассыыйатааҕы, өрөспүүбүлүкэтээҕи куонкурустарга ситиһиилэннилэр.
Төрөөбүт нэһилиэкпит инники сайдыытыгар, түмсүүлээх буолууга ассоциация биир сомоҕо буолан үлэлиир.
Надежда ГРОМОВА,
РФ суруналыыстарын сойууһун чилиэнэ,
эбии үөрэхтээһин педагога.