Бүгүн, ыам ыйын 9 күнүгэр Кыайыы күнүнэн сибээстээн, Улахан Аан нэһилиэгэр парад буолла.
Сарсыарда 10 чааска трасса кырыытыгар турар “Байаар” маҕаһыын таһыгар мустуу саҕаламмыта. Улахан Аан олохтоохторо уонна үөрэнээччилэрэ кэлбиттэрэ.
11 чааска парадпыт саҕаламмыта. Бары байыаннай таҥаспытын кэтэн тураммыт хаама барбыппыт. “Байаара” маҕаһыынтан кулуупка диэри парадтаан хаамтыбыт. Кулууп аттыгар паамытынньыкка уот умаппыттар этэ. Бу улуу күнү көрсөргө барытын бэлэмнээбиттэр.
Улахан Аан олохтоохторо ырыа ыллаан, хоһоон ааҕан, киһи-аймах саамай кырыктаах сэриитин ааспат-арахпат ыар кутурҕанын санаттылар. Салгыы тыыл бэтэрээннэрин, сэрии сылын оҕолорун, парадка кэлбит Улахан Аан олохтоохторун саллаат хааһытынан күндүлээтилэр. Ол кэнниттэн бары хаартыскаҕа түстүбүт.
Бу күн киһи-аймах историятыгар умнуллубат суолталааҕын өйдөөн, Кыайыы күнүн үөрүүтүн сүрэхпитигэр илдьэ дьиэбитигэр тарҕастыбыт.
Аман ЕРЕМЕЕВ, VII кылаас,
М.Е. Васильева аатынан 2 Малдьаҕар орто оскуолата, Хаҥалас.