Арассыыйа уонна Саха Өрөспүүбүлүкэтин суруйааччыларын, суруналыыстарын сойууһун чилиэнэ, ырыа буолбут хоһооннордоох бэйиэт, Арассыыйа географическай уопсастыбатын чилиэнэ, норуот эмчиттэрин академига, Үөһээ Бүлүү улууһун бочуоттаах олохтооҕо Иван Еремеевич Иванов-Ороһуунускай олох кыра сааһыттан Исидор Барахов кимин-тугун олус интэриэһиргээбит.
Ити барыта Афанасий Федоров «Олох долгуннара» арамаанын аахпытыттан саҕаламмыт. Аны бэйэтэ Үөһээ Бүлүү оройуонун Ороһу нэһилиэгиттэн төрүттээх буолан, Исидор Барахов аатынан холкуос, сопхуос баарын истэн билэрэ. Үөһээ Бүлүүгэ Исидор Барахов оскуолатыгар үөрэнэ тиийэн баран, аан бастаан библиотекаҕа тиийэн, саһарбыт лиистээх урукку хаһыаттары арыйталаан көрөрө. Онно кини интэриэһиргиир аата суоҕун сөҕөрө.
Улааппытын кэннэ биирдэ оскуолатын директора Александра Андреевна Черепанова-Барахова, Исидор Барахов кэргэнэ, сайын ыһыахха кэлэр диэн иһитиннэрэр. Оскуоланан онно бэлэмнэнэллэр. Исидор Барахов төрөөбүт күнүгэр анаан илиинэн оҥоһуллубут оскуола уопсай хаһыатын Иван Еремеевич редактордаан таһаараллар. Ахсыс кылааска үөрэнэ сылдьан «Костер» пионерскай сурунаал ыыппыт кэпсээн суруйуутун күрэҕэр кыайан, «Орленок» лааҕырга барар дьолго тиксэр. Дириэктэрэ Д.С. Спиридонов аадырыс биэрэн, суруктаах эҥин, Москваҕа олорор Александра Андреевна Черепановаҕа дьонтон ыйдаран тиийэр. Алексанра Андреевна оҕо кэлбитигэр олус үөрэн, оскуолатын туһунан ыйыталаһар. Онтон Максим Аммосов кэргэнин Рая Цугелы кытта көрүһүннэрэр. Ити курдук улуу дьон кэргэттэрин кытта көрсүспүт дьоллоох.
Иван Еремеевич улаатан, үлэһит буолан баран, Исидор Бараховы кытта көрсүбүт, бииргэ улааппыт дьонтон ахтыы ылан хаалбыт үтүөлээх. Кини ылбыт ахтыыларыттан биһиги кыракый Исидор сөтүөлүүр сир оҥорбутун, обургу буолан баран, Карл Марс «Капиталын» аахпытын, биир тылынан оҕо сааһын туһунан билэбит. Исидор Бараховы уобарас гынан суруйааччылар А. Федоров, Н. Якутскай айымньыларыгар киллэрбиттэрэ. Оттон аан бастакы уус-уран айымньыны «Биһиги Исиидэрбит» диэн пьесаны кини суруйбута. «Исиидэр Бараахап туһунан ырыа» диэн хоһоонугар В.В. Ефимов-Баянист Баака, Т.И. Шестаков матыыптарыгар бастакы ырыа айыллыбыта. Ырыаны педагогическай үлэ бэтэрээнэ, Үөһээ Бүлүү улууһун, Үөдүгэй, Харбалаах нэһилиэгин бочуоттаах олохтооҕо, СӨ култууратын туйгуна Анна Дмитриева-Иванова көччөх гынан көтүппүтэ.
Ити курдук Иван Еремеевич Иванов-Ороһуунускай оҕо сааһыттан Исидор Бараховы интэриэһиргээбитин айымньыга киллэрэн үйэтиппит. Кинини 2008 сыллаахха Харбалааах орто оскуолатын И. Барахов аатынан оҕо тэрилтэтэ «Бочуоттаах бараховец» диэн биир бастакынан Ытык ааты иҥэрбиттэрэ.
Евдокия Семенова, И. Барахов аатынан СӨ судаарыстыбаннаһын түмэлин үлэһитэ.
keskil14.ru