Тыа уол оҕото барахсан кыра сааһыттан аҕатын батыһа сылдьан саха эр киһитин сатабылыгар барытыгар үөрэнэр. Хаптаҕай орто оскуолатын 7 кылааһын үөрэнээччитэ Уйбаан Егоров тыа сирин үлэтин сатаабатаҕа, сыстыбатаҕа диэн суох.
Уйбаан Егоров— 4-5 сыанаҕа үөрэнэр оскуола биир бастыҥ үөрэнээччитэ, спортсмен бэрдэ, хайыһардьыт. Кылаас, оскуола уопсастыбаннай олоҕор көхтөөтүк кыттар, уолаттар ансамбыллларыгар, муода театрыгар дьарыктанар. 
Уйбаан аҕата, Леонид Иванович, нэһилиэккэ биир ситиһиилээхтик дьаһанан олорор бааһынай хаһаайыстыба салайааччыта, сүүстэн тахса сыспай сиэллээҕи, отучча ынах сүөһүнү көрөр-истэр.
Көмөлөһөөччүтүтүнэн уола Уйбаан буолар. Уол кыһынын ат аһатан, сайынын оттоһон, көмө киһитэ. Аҕалаах уол быыстарыгар бултууллар,балыктыыллар. Илии тутуурдаах, өттүк харалаах кэлэн үөрдэллэр.
Итини таһынан, Егоровтар кууруссаны, куһу иитэллэр.Инкубаторга сымыыттан чоппуусканы таһаараллар. Чоппууска тахсара бэрт улэлээх эбит, бириэмэтинэн көрөн, сымыыты эргитиллэр, сырдык эрэсиимэ, температурата кытаанахтык тутуһуллар. Уйбаан ити улэни бэркэ кыайа тутар. Сыныйан үөрэтэн, кэтээн көрөн, дакылаат суруйан, НПК -ҕа үлэтэ биһирэммитэ.
Егоровтар дьиэ кэргэн оҕуруот аһын, сибэкки арааһын эмиэ кыайа хото үүннэрэллэр. Бу үлэҕэ барытыгар уоллара күүс- көмө буолар. Үлэ-сынньылаҥ кэмин сатаан аттарарга, бириэмэни сөптөөхтүк туһанарга, сатабылга Уйбаан күннэтэ аҕатын кытта тэҥҥэ үлэлэһэн үөрэнэр. Сайыммыт кылгас, былдьаһыктаах күннэрин баттаһан, билигин Егоровтар дьиэ кэргэҥҥэ — от күүстээх үлэтин үгэнэ…
Инникитин Уйбаан Егоров ханнык да идэлээх үлэһит буоллар, кыра эрдэҕиттэн иҥэриммит саха уолун дэгиттэр сатабыла олоҕор төһүү буолара саарбаҕа суох. Аҕатын Леонид Иванович курдук төһүү үлэһит, сатабыллаах хаһаайын буоларыгар эрэнэбит.
Ааптар: Нина Яковлева, «Кустук» телестудия салайааччыта