Биһиги оскуолабытыгар Ийэ тыл уонна сурук-бичик күнүгэр анаммыт нэдиэлэ олус сэргэхтик, интэриэһинэйдик ааста.
«Эллэй эһэбит эһиэкэйэ» диэн үөрүүлээх линейкэҕэ мустан оһуохайдаатыбыт, алгыстаах алаадьы амсайдыбыт, ыраастанан нэдиэлэбитин үөрүүлээхтик арыйдыбыт. Оскуолабытыгар хас бэнидиэнньик аайы буолар «Дьоһуннааҕы кэпсэтии» уруоктар ыытылыннылар.
Биир дойдулаахпыт, «Амма олоҕо» хаһыакка өр сылларга суруналыыһынан үлэлээбит суруйааччы Иван Никитич Корякин-Уйбаан Бөтүүнүскэй 85 сааһын көрсө нэдиэлэ устата араас тэрээһиннэр ыытылыннылар. Олохтоох суруйааччыбыт олоҕун, айар үлэтин туһунан сүүрбэ боппуруостаах онлайн викторина ыытылынна. Эһиги эмиэ бу ссылканан киирэн ыйытыыларга эппиэттиэххитин сөп https://forms.gle/nXVbXGrikTDwreqi8
«Уйбаан Бөтүүнүскэй холбуката» диэн төрөппүт оҕотун кытта оҥорбут уруһуйдарын, пазлларын, таайбараҥнарын нэдиэлэ устата аҕалан туттардылар.
Уйбаан Бөтүүнүскэй айар үлэтин, кини айымньыларын кэпсиир оҕолор уруһуйдара быыстапка буолан турда. Уруһуйдар оскуола саалатын эркинин толордулар. Оннук элбэх оҕо кыттыыны ылла.
«Иитиллибит ийэ тылым» диэн Уйбаан Бөтүүнүскэй хоһоонунан челлендж ыытыллан, учууталлар уонна үөрэнээччилэр ааҕыыларыгар видеоролик оҥоһулунна.
Ити курдук биһиги Ийэ тыл уонна сурук-бичик күнүгэр аналлаах нэдиэлэҕэ олохтоох суруйааччыбыт Уйбаан Бөтүүнүскэй туһунан элбэҕи биллибит.
Нарияна БОРИСОВА, Сайаана НЕУСТРОЕВА, Виолетта СЕРГЕЕВА, Вика НЕУСТРОЕВА,
Н.Е. Иванов аатынан Бөтүҥ орто оскуолатын юнкордара, Амма.