Ааспыт үөрэх дьылыгар биһиги холбоһукпутугар Намнааҕы кэллиэһи бүтэрбит эдэркээн учуутал үлэлии кэлбитэ. Кини аата Кристина Игнатьевна Старостина диэн. Төрдүс кылаастары үөрэппитэ. Илииттэн илиигэ сылдьан, ыһыллан хаалбыт кэлэктииби бэрт кылгас кэм иһигэр сомоҕолообута. Ирдэбиллээх буолан, үгүһү ситиспитэ.
Ол курдук саас ВПР-га үгүс оҕо хаачыстыбаҕа үлэлээбитэ, куһаҕан сыананы ылбыт оҕо суоҕа. Бу саҥа үлэлиир учууталга ситиһии буолар! Үөрэҕи таһынан, араас хайысхаҕа былааннаан, иитэр үлэтин тэрийбитэ. «Ытык сирдэр» бырайыакка кыттан, Калистрат Елисеевич Владимиров аатынан КСК тиэргэнин иһэ, таһа ыраас, хомуллуулаах буоларын ситиспиттэрэ. Чулуу тустуук олоҕун, спортивнай ситиһиилэрин, үлэтин-хамнаһын чинчийбиттэрэ.
«Оскуола театра» түмсүү тэрийэн ыытар Амма Аччыгыйа «Сааскы кэм» арамаанынан инсценировканы көрүүгэ биир бастыҥынан ааттанан, улуустааҕы «Эдэр актер» күрэххэ кыттарга мэктиэлэммиттэрэ. «Эдэр актер» күрэххэ иккис миэстэни ылан, үөрэн-көтөн кэлбиттэрэ. Салгыы «Кустук» өрөспүүбүлүкэтээҕи драматическай көрүүгэ ситиһиилээхтик кыттан, «Кэскиллээх кэлэктиип» анал аакка тиксибиттэрэ.
Кылаас оҕото бары «Хоһоонноохтук ааҕыы» дьарыгар сылдьаллар. Араас күрэхтэргэ кыттан, куруук миэстэлэспиттэрэ. Онтон саамай улахана «Язык предков» тэрийиитинэн «Кыайыы күнүнэн» күрэххэ кыайыылаах аатын сүгэн,1 миэстэни ылбыттара буолар. Бу Арассыыйа араас регионнарыттан кыттыылаах күрэс этэ.
Кристина Игнатьевна төрөппүттэрин кытта биир сомоҕо буолан үлэлиир. Ол түмүгэр кылаас алын сүһүөҕү бүтэрэринэн отчуоттуур кэнсиэрэ үрдүк таһымҥа туруоруллубута буолар.
Быйыл Кристина Игнатьевна маҥнайгы кылаастары ылан, ааҕарга-суруйарга, суоттуурга үөрэтэн саҕалаата. Кырачааннар учууталларын наһаа сөбүлээтилэр, уоскулаҥҥа аттыттан арахпат мөккүөннээхтэр.
Удьуор утума салҕанар холобурун бу Кристина Игнатьевнаҕа көрөбүн. Ийэтинэн эбэтэ Альбина Лукинична Посельская Дьохсоҕоттор биир киэн туттар учууталлара этэ. Аҕатынан эдьиийдэрэ Голиковалар Хара-Алданнар тумус туттар учууталлара буолаллар.
Эдэркээн учууталы, Кристина Игнатьевнаны, кэлэн иһэр идэлээх күммүтүнэн эҕэрдэлиибин!Саҕалаабытыҥ курдук салҕана турдун! Кырачааннары сайыннарар, үөрэтэр үлэҥ ситиһиилээх буоллун! Кэскилиҥ өссө да иннигэр! Оҕо аймах тапталын-махталын ылан, учуутал бастыҥа, уһуйааччы үтүөлээҕэ буола, үүн-сайын!
СӨ үтүөлээх учуутала Валентина Семеновна Кривошапкина, Таатта, Харбалаах.