Биһиги, театр-студия «Саха kids» оҕолоро, Хейхе куоракка ыытыллыбыт фестиваль кэннэ Удалянчи куоракка ыалдьыттаабыппыт. Манна санаторийга түспүппүт. Бастакы күммүтүгэр тута сөтүөлүү баран олус астынан кэлбиппит. Киэһээҥҥибитин аһаан баран тохтообут санаторийбыт ыалдьыттарыгар биһиги олоҥхобутун, Майа оҕолоро фольклордарын, Эбээн Бытантай кырачаан кыргыттара акробатическай номеры көрдөрбүппүт. Көрөөччүлэр бары наһаа сөхпүттэрэ, хайҕаабыттара. Кыттыбыт оҕолорго бука барыбытыгар мэтээл, бэлэх түҥэппиттэрэ.
Сарсыҥҥы күнүгэр «Чжунлин» диэн буддийскай храмҥа барбыппыт. 354 үктэли дабайан, саамай үрдүгэр тахсан хаартыскаҕа түспүппүт, Удалянчи куораты үөһэттэн көрөн астыммыппыт, сөхпүппүт-махтайбыппыт. Кытайдар бу храмнарын үөһээ чыпчаалыгар тахсаннар баҕа санааларын суруйаллар, кыһыл лиэнтэлэри ыйыыллар эбит. Салгыы «Музей вулканов» диэн ааттаах түмэлгэ барбыппыт. Бу түмэлгэ Удалянчи куорат айылҕатын уратыта, кыыллара-көтөрдөрө көрдөрүүгэ бааллара. Киэһэ сынньалаҥмытыгар теннистиир, бильярдтыыр уонна сөтүөлүүр этибит.
Миэхэ бу баран кэлии элбэх үчүгэй түгэннэри хаалларда. Киэһээҥҥи Хэйхэ куорат өрүһүн кытыытынан күүлэйдээбиппин, Удалянчи куорат «Чжунлин» храмыгар сылдьыбыппын өйдүү-саныы сылдьыам. Маннык күрэхтэргэ сылдьан киһи үгүс саҥаны билэн, элбэх доҕоттордонон, оҕолортон элбэххэ үөрэнэн кэлэр эбит.
Ол кэмнэртэн түгэннэри видео-матырыйаалбытыгар сиһилии көрүҥ: https://vk.com/wall97384707_388
Розалина Романова, VII кылаас,
“Проба пера” юнкора, Чыамайыкы, Мэҥэ Хаҥалас
Видео-матырыйаал: Валерия Романова, X кылаас,
“Проба пера” юнкора, Чыамайыкы, Мэҥэ Хаҥалас