Педагог диэн бу учуутал эрэ буолбатах, кини өссө иитээччи, уһуйааччы. Мин бүгүн чугастык алтыһан үлэлэһэр дьоммуттан биирдэстэрин, учууталым Протодьяконова Саргылана Иннокентьевна туһунан суруйуохпун баҕарабын.
Москва куорат 1514 №-дээх оскуолатын 2021 сыллаах выпускницата, биир кэлим судаарыстыбаннай эксээмэннэргэ бары предметтэрин 400 баалга туттарбыт Гришина Екатерина 2023 сылы «Педагог уонна уһуйааччы» сылынан биллэрэр туһунан этии киллэрбитин, дойдубут Президенэ В.В. Путин сэргээн уонна өйөөн, быйылгы сыл Россияҕа Педагог уонна уһуйааччы сылынан биллэриллибитэ.
Протодьяконова Саргылана Иннокентьевна Уус Алдан улууһун Лөгөй орто оскуолатыгар дириэктэри научнай үлэҕэ солбуйар, идэтинэн нуучча тылын уонна литературатын учуутала.
Саргылана Иннокентьевна биһиги кылааһы улуу нуучча тылыгар умсугутан үөрэтэрин таһынан, билим эйгэтигэр элбэх оҕону сатабыллаахтык салайан илдьэ сылдьар. Кини үөрэнээччигэ интэриэһин таба көрөн, сөптөөх тиэмэни булан, салгыы үлэлэһэригэр сүбэ-ама биэрэр, наука дириҥ далайыгар бастакы хардыыны оҥороругар олук уурар. Мин салайааччыбын кытары А.Е.Кулаковскай-Өксөкүлээх Өлөксөй литературнай нэһилиэстибэтин харыстааһыҥҥа, сайыннарыыга уонна тарҕатыыга аналлаах үлэни саҕалаабыппыт быйыл үһүс сыла. 2021 сыллаахха Москва куоракка тиийэн, Д.И. Менделеев аатынан Бүтүн Россиятааҕы күрэххэ кыттан кыайыылаах буолбуппар учууталбар, научнай салайааччыбар Саргылана Иннокентьевнаҕа махталым муҥура суох.
Мин учууталбын олус убаастыыбын. Кини оҕоҕо истиҥ сыһыаннаах, киэҥ билиилээх, түргэн-тарҕан туттунуулаах, олоҕу кытары тэҥҥэ хардыылаан иһэр билиҥҥи кэм педагога. Учууталбыт биһиэхэ өрүү туһаайан этэр, сөбүлээн уонна сүбэлээн туттар тылларынан буолаллар: “В XXI веке самые востребованные люди—мобильные”, “Краткость—сестра таланта”. Ити хаачыстыбалары биһиги бэйэбитигэр иҥэринэргэ, иитинэргэ дьулуһабыт.
Бу тохсунньу ыйга өрөспүүбүлүкэтээҕи Республикатааҕы “Инникигэ хардыы” (“Шаг в будущее”) научнай-практическай кэмпириэнсийэҕэ олус ситиһиилээхтик кыттан кэллибит. Бу улахан таһымнаах күрэххэ Саргылана Иннокентьевна салайааччы быһыытынан бэлэмнээбит түөрт үөрэнээччитэ лауреат үрдүк аатын ыламмыт, салгыы Москва, Казань, Ярославль куораттарга кыттарга мэктиэлэнэммит, учууталбытын үөртүбүт, кини биһиэхэ эрэлин түһэн биэрбэккэ бу ситиһиибитинэн тапталлаах салайааччыбытыгар «Педагог уонна уһуйааччы» сылыгар бэртээхэй бэлэх оҥордубут диэн үөрэбит уонна астынабыт.
Убаастыыр учууталбар үлэтигэр өссө үрдүк ситиһиилэри, үгүс үөрүүлээх түгэннэри, толору дьоллоох олоҕу баҕарабын!
Бурнашева Айгыына , Лөгөй орто оскуолатын
Х кылааһын үөрэнээччитэ, Уус Алдан.