«Саха сирин дьахталлара – дойду эрэллээх тыыла» диэн этиинэн салайтаран номнуо сарсыҥҥыттан, балаҕан ыйын 25 күнүттэн, бүтүн Саха сирин дьахталларын спартакиадата Дьокуускай куоракка саҕаланар. Бу бэлиэ тэрээһин дьахталлар – кэрэ аҥаардар спорт эйгэтигэр сыстыыларыгар уонна да атын социальнай хайысхалары таарыйар сыаллаах ыытыллар.
Хас биирдии улуус манна бэйэлэрин кыттааччыларын тэрийэн, бэлэмнээн, Дьокуускай куоракка ыыталаан олороллор. Ол курдук Ньурбабыт улууһа эмиэ. Онтон биһиги Хаҥаласпыт дэриэбинэтиттэн икки учуутал-дьахтар кыттыыны ыла бардылар. Физкультура учуутала Вероника Владимировна Васильева буулдьанан ытыыга, Туйаара Анатольевна Алексеева дуобакка. Кыра нэһилиэктэн икки кыттааччы баара бэйэтэ туспа үчүгэй көрдөрүү диэн саныыбыт.
Бүгүн биһиги учууталбыт Туйаара Анатольевна туһунан кыратык сырдатыахпытын баҕарабыт. Кини алгебра, геометрия уонна математика учуутала. Үлэлээбитэ номнуо уонтан тахса сыл буолла. Кини олус опыттаах, билиилээх учуутал, оҕолору суот эйгэтигэр дөбөҥнүк киллэрэн, өйдөтөн биэрэр. Туйаара Анатольевна үөрэнээччилэрэ БКЭ-ҥэ өрүү үчүгэй эрэ сыананы ылаллар, тоҕо диэтэххэ кини олус кыһаллан үөрэтэр. Өссө эбиитин иллэҥ кэмигэр атын оҕолорго математикаҕа, БКЭ туттарарга онлайн дьарык ыытар, баҕалаах оҕо баһаам.
Учууталбыт олус актыыбынай киһи. Кини оҕо сылдьыаҕыттан теннисист бэрдэ. Элбэх күрэхтэһиилэргэ кыттан бастаан, миэстэлэһэн ситиһиилэнэн кэлэр эбит. Кинини учуутала Василий Тимофеевич Иванов уһуйбут. Өссө тенниһи таһынан Василий Тимофеевич Туйаара Анатольевналааҕы дуобат умсулҕан эйгэтигэр киллэрбит. Быыс буллулар да теннис быыһыгар дуобаттатар эбит. Онон биһиги учууталбыт олус өйдөөх, мындыр толкуйдаах оҕо буолан дуобатчыт бэрдэ буолбут.
Учууталбыт кэргэнэ Борислав эмиэ теннисист бэрдэ, кинилэр дьиэ кэргэнинэн бары спортсменнар. Сайын кыра уоллара Олимпий Китайга баран теннискэ дьарыктанан кэлтэ. Туйаара Анатольевна итинник бэйэтин оҕолорун эмиэ спортка сыһыаран иитэр. Кини бу күрэхтэһиигэ ситиһиилээх кэлиэ диэн эрэнэбит.
Биһиги учууталларбытыгар Туйаара Анатольевна уонна Вероника Владимировнаҕа бу буолаары турар улахан күрэхтэһиигэ ситиһиилэри баҕарабыт! Кыайыы көтөллөөх сылдьыҥ!
Таня Иванова, Нелли Антонова, «Ыллык» пост Ньурба, Хаҥалас.
keskil14.ru