Бүгүн, алтынньы 5 күнүгэр, Саха сирин Учууталларын уонна педагогическай уопсастыбаннаһын XIV съеһин пленарнай мунньаҕа ыытылла турар. Бу күн өрөспүүбүлүкэ бастыҥ педагогтарын чиэстээтилэр.
Үөрэхтээһин сайдыытыгар, учуутал идэтэ уонна аптарытыата үрдүүрүгэр тус кылаатын уонна өр кэмнээх сыралаах, айымньылаах үлэтин иһин «Норуот учуутала» бочуоттаах аат Чурапчы улууһун бочуоттаах олохтооҕор, РСФСР үтүөлээх учууталыгар, педагогическай үлэ бэтэрээнигэр Дмитрий Чечебутовка туттарылынна.
Педагогика эйгэтигэр М.А. Алексеев аатынан Саха Өрөспүүбүлүкэтин Судаарыстыбаннай бириэмийэтинэн үөрэх эйгэтигэр үрдүк көрдөрүүлэрин, Арассыыйа олимпиадаларын кыайыылаахтарын иитиитигэр тус кылаатын иһин Дьокуускай куорат 12 №-дээх орто оскуолатын физика учууталыгар Эрнест Мярикянов наҕараадаланна.
Наука уонна техника эйгэтигэр эдэр учуонайдар, исписийэлиистэр ситиһиилэригэр В.П. Ларионов аатынан СӨ Судаарыстыбаннай бириэмийэтэ экстрапирамиднай кэһиллии эпидемиологическай уонна клинико-генетическай характеристикатын чинчийии үлэтин иһин М.К. Аммосов аатынан ХИФУ неврология, психиатрия кафедратын доценыгар Алексей Таппаховка туттарылынна.
keskil14.ru
Андрей Сорокин хаартыскалара.