Бу 2023 сыл Россия үрдүнэн Педагог уонна уһуйааччы сылынан биллэриллибитэ. Онон сибээстээн биһиги улууспутугар уһуйааччыларга, учууталларга анаан элбэх күрэхтэр, көрсүһүүлэр саҕаланнылар.
Ньурба улууһугар тохсунньу 24-25 күннэригэр сылын аайы ыытыллар учууталлар хамаандаларыттан турар «Методическай турнир» үрдүк таһымнаахтык ыытыллан ааста. Күрэх сүрүн сыаллара — бэйэни көрдөрүү, уопут атастаһыыта, учууталларга саҥаны арыйыы. Уопсайа бу күрэххэ улуус араас оскуолаларыттан 17 хамаанда кытынна. Бу оскуолалар көхтөөхтөрүн, сомоҕолуулаахтарын көрдөрөр диэн бэлиэтиибин.
Биһиги 1-Хаҥалас Н.И. Кочнев аатынан оскуолабытыттан эдэр, эрчимнээх учууталлар: Анна Владимировна Мордовская, Христина Федоровна Захарова нуучча тылын уонна литературатын учууталлара, Милена Прокопьевна Иванова алын кылаас учуутала уонна Алена Ивановна Федорова физкультура учуутала бэриниилээхтик кыттыыны ыллылар, оскуолабыт аатын көмүскээтилэр.
Муҥутуур кыайыылаах үрдүк аатын “МиГ” Ньурбатааҕы элбэх хайысхалаах гимназия хамаандата ылла. Номинациялар кыайыылаахтара: «Лучший электронный ресурс» Ньурбатааҕы элбэх хайысхалаах гимназия «ХЭШ Tech» хамаандата, “Лучший образовательный проект” — Өҥөлдьө орто оскуолатын “Е” хамаандата, «Лучшая педагогическая мастерская» — Хорула орто оскуолатын «Феникс» хамаандата уонна “Лучший час с классом” — Маар орто оскуолатын “Айпед” хамаандата.
Онтон тэрийэн ыыппыт Чаппанда оскуолата туспа биһирэбилин Маалыкай орто оскуолатын «Smart Team» хамаандатыгар анаата.
Метотурнир кыайыылаахтарын уонна кыттыылаахтарын эҕэрдэлиибит, онтон “МиГ” хамаанда учууталларыгар Өрөспүүбүлүкэтээҕи түһүмэххэ ситиһиилээхтик кыттан кэлэллэригэр баҕарабыт!
Олеся Петрова, 11 кылаас, «Ыллык» пост, Ньурба, Хаҥалас.