Хаптаҕай аҕыс кылаастаах оскуолатыгар 1960-с сыллардаахха үөрэммит уонна 1966 сыллаахха бүтэрбит выпускниктар учууталларын — Саха Республикатын үтүөлээх учуутала Елизавета Семеновна Оконешникова 95 сааһын бэлиэтээн, учууталларын үтүө аатыгар сүгүрүйэн, гражданскай сэрии дьоруойа Кеша Алексеев аатын сүгэр Хаптаҕай орто оскуолатыгар ахтыы-көрсүһүү тэрийдилэр.
Алта уонча сыл анараа өттүгэр оскуолабыт Саха сирин «опытно-показательнай оскуолата» этэ (ЯНОПШ).
Бу оскуолаҕа олус күүстээх учууталлар үлэлээбиттэрэ. Ол курдук, Лука Никифорович Харитонов, Парфений Никитич, Надежда Евменьевна Самсоновтар, оскуолабыт билиҥҥи С.Н. Донской-II аатынан Үөрэҕи сайыннарар уонна учууталлар идэлэрин таһымын үрдэтэр институт оруолун толорон олорбут эбит. Дьэ, бу курдук күүстээх оскуолаҕа, республикаҕа биллэр учууталлар олохтообут методическай баазаларыгар Елизавета Семеновна 1960-с сылларга олус таһаарыылаахтык үлэлээн ааспыт.
Үөрэнээччилэрэ учууталлара олох атын учууталлартан туспа методиканан, оҕоҕо олус тиийимтиэ гына үөрэтэрин, хас биирдии үөрэнээччигэ болҕомтолоох сыһыанын эттилэр. Олоххо, дьоҥҥо, үлэҕэ сыһыаҥҥа, бу орто дойдуга сиэрдээхтик, үтүөнү сыаналыырга, дьон тэҥэ сылдьарга учууталбыт олук уурбута диэн сиһилии кэпсээтилэр.
Салгыы кинилэр ханна да үлэлээтэллэр, Елизавета Семеновна аатын түһэн биэрбэккэ, кини аатын өрүү өрө тутан кэлбиттэрин эттилэр. Учууталларын сырдык аатыгар нуучча тылыгар бастыҥ үөрэнээччигэ стипендия олохтообуттара. Елизавета Семеновна олоҕун Александра Павловна Шапошникова, учуутал үлэтин ХИФУ профессора, филологическай наука доктора Евдокия Николаевна Дмитриева сиһилии билиһиннэрдилэр. Истиҥник аҕыннылар Василий Прокопьевич Соломонов, Анисия Петровна Яковлева, Наталья Васильевна Назарова, биир учуутал оҕо дьылҕатыгар улахан оруоллааҕын эттилэр. Учууталыгар анаабыт хоһоонун Елена Николаевна Алексеева уонна бииргэ үөрэммит, хоһоон айааччы Александр Спиридонов «Дойдум Хаптаҕай» хоһоонун Петр Егорович Ефимов аахтылар. Елизавета Семеновна саҕана саҥа үлэтин саҕалаабыт ветеран учуутал РФ үөрэҕириитин туйгуна Дария Даниловна Ларионова үтүө киһи туһунан, учууталлар уопсайдарыгар ыаллыы олорбутун кэпсээтэ.
Маннык истиҥ көрсүһүүттэн үөрэнээччилэр, билиҥҥи көлүөнэ, педколлектив үтүөлээх учуутал, Бүтүн Россиятааҕы учууталлар съезтарын делегатын уонна ол сийиэскэ Саха сирин делегациятын аатыттан тыл эппит, оскуолабытыгар үлэлээн ааспыт, Улахан Учуутал туһунан элбэҕи биллибит уонна бу күҥҥэ диэри аата ааттана турарыгар кылааты киллэрэр үөрэнээччилэригэр, 1966 сыллаах выпуска махтанабыт. Оскуолабыт директора Ирина Владимировна Кычкина, выпусниктарга махтанан туран, Елизавета Семеновна Оконешникова аатын оскуола алын кылааһын нуучча тылын кабинетыгар иҥэрэр туһунан бирикээһи билиһиннэрдэ. Көрсүһүүнү «Кустук» медиастудия оператора, 10 кылаас үөрэнээччитэ Юра Павлов видеоҕа устан историяҕа хаалларда.
Истиҥ тэрээһини иилээн-саҕалаан, тэрийэн ыыттылар оскуолабыт уопуттаах нуучча тылын учууталлара — Майя Гаврильевна Самсонова, Светлана Анатольевна Кокорева уонна Мария Николаевна Кривошапкина. Майя Гаврильевна, Светлана Анатольевна уһулуччулаах учуутал Елизавета Семеновнаҕа үөрэммит дьоллоохторун эттилэр.
Нина Яковлева, «Кустук» медиастудия салайааччыта.