Күндү таптыыр ытыктыыр учууталбыт Любовь Святославовна!
Саха Республикатын үөрэҕириитин туйгунун, “Методист Якутии” үрдүкү аат хаһаайкатын, Российскай Федерация “Лучший учитель” кыайыылааҕын, Российскай Федерация үөрэҕириитин бочуоттаах улэһитин Любовь Святославовнабытын Учуутал өрөгөйдөөх күнүнэн эҕэрдэлээн туран ис сүрэхтэн 17 нүөмэрдээх орто оскуола 3 «В» кылааһын үөрэнээччилэрин уонна төрөппүттэрин ааттарыттан истиҥ тылларбытын уонна махталбытын тиэрдэбит.
Убаастыыр учууталбыт Любовь Святославовна өрүү эдэрдии эрчимнээх, сып-сырдык мөссүөннээх, кэрэ-бэйэлээх сэбэрэлээх. Оҕолорго барыларыгар олус истиҥ тэҥ сыһыанынан оҕолор убаастабылларын, тапталларын ылыан ылар. Үөрэх чааһыгар оҕолорго ирдэбилэ кытаанах. Чиҥ билиини эрэйэр. Кылааска ыытыллар тэрээһиннэр барыта туох эрэ уратылаах, оҕолор интэриэстэрин тардар туһугар кыһаллар. Хас биирдии оҕо тула өттүнэн эргиччи сайдыылаах, үөрэҕэр кыһамньылаах, чиэһинэй, аныгы сайдыылаах олоххо бэлэм буолар гына күүһүн-кыаҕын, сатабылын биэрэр биһиги учууталбыт.
Маҥнайгы кылааска киириэхпититтэн Любовь Святославовна хас биирдии оҕо киһи быһыытынан сайдарыгар, бэйэтин санаатын сааһылаан этэригэр уонна киэҥ толкуйдаах ыччат буолан тахсарыгар кыһаллар. Салгыы оҕолор учууталларын хайдах саныылларын тистибит:
— Любовь Святославовна өрүү эйэҕэс сыһыаннаах, наһаа үчүгэйдик үөрэтэр, барытын быһаарар уонна наар үөрэ сылдьар, биһигини ааҕарга суруйарга үөрэттэ, элбэҕи билиһиннэрдэ.
— Любовь Святославовна кылааска киирэн кэллэҕинэ, кылааспыт иһэ сырдыыр, куруутун мичээрдээн: “Чэ эрэ, оҕолор, уруокпутун саҕалаатыбыт!” ,— диэн үөрбүтүнэн этэр. Наһаа учугэйдик быһаарар барытын уонна үөрэтэригэр наһаа кыһаллар.
— Биһиги учууталбыт наһаа үчүгэйдик таҥнар, кыһыл өҥү сөбүлүүр, наар кыһыл дьүһүннээх куопталаах, жакеттаах, кини наһаа кыраһыабай уонна өйдөөх.
— Любовь Святославовнаҕа мин эдьиийим үөрэммитэ, аны мин эмиэ киниэхэ үөрэнэбин, кинини көрдөхпүнэ өрүү үөрэбин уонна киэн туттабын, биһи дьиэ кэргэн Учуутала диэн ааттыыбыт.
Бу буоллаҕа учууталга үөрэнээччи билиниитэ, ытыктабыла, махтала!
Күндү Любовь Святославовна!
Эйиэхэ баҕа санаа бастыҥын аныыбыт, чэгиэн чэбдик туруктаах, уйгу-быйаҥ аргыстаах, дьоллоох уһун олоҕу баҕарабыт! Сырдык сулустуу — эн сыдьаайдыҥ, билии-көрүү аартыгын тэлэһийэ — эн астыҥ!
Маҥнайгы чуорааны чугдаарпыт биһиги Учууталбыт Любовь Святославовна! Үөрэ-көтө сырыт, тус бэйэҥ уонна дьиэ кэргэниҥ бука бары чэгиэн буоллуннар! Бүгүҥҥү күнүҥ быйаҥнаах, Сарсыҥҥы күнүҥ сардаҥалаах, Өйүүҥҥү күнүҥ өрөгөйдөөх, Кэлэр күннэриҥ кэскиллээх буоллуннар!