Ороһу орто оскуолатыгар биология, химия биридимиэтин үөрэтэр биһиги, сэттистэр, кылааспыт салайааччыта Галина Юрьевна Габышева. Киниттэн ханна үөрэммитин, атын үөрэхтэртэн туох уратылааҕын ыйыталастым уонна манныгы биллим.
Кини 2009 сыллаахха Хотугулуу-Илиҥҥи федеральнай университекка естественнай наукалары үөрэтэр институтка туттарсан биолог идэтигэр үөрэммит. Бүтэрэригэр икки дипломнаах (биолог, педагог) бүтэрбит. Научнай салайааччыта Константин Константинович Кривошапкин, куратора Вилюра Егоровна Кардашевская эбиттэр. Сүрүн идэни биэрэр биридимиэттэргэ цитологияҕа Гаврил Спиридонович Угаров, ботаникаҕа Надежда Ивановна Иванова, морфологияҕа Муза Николаевна Мординова үөрэппиттэр.
Атын үөрэхтэртэн уратыта, хонууга быраактыканы барыы буолар. Быраактыкаларын Нам улууһугар, Хатырык нэһилиэгэр биир ый аһаҕас халлааҥҥа балаакканан сытан үүнээйилэри, уу, хонуу үүнээйилэрин, тулалыыр эйгэлэригэр баар кыыллары, көтөрдөрү чинчийэн үөрэппиттэр. Үүнээйилэри хатаран гербарий оҥорбуттар, кыыллар ис уорганнарын үөрэппиттэр. Үөрэҕэр ылбыт чиҥ билиитинэн биһигини үөрэтэр.
Биһиэхэ үлэлии кэлиэн иннинэ Өлөөн улууһун «Сыл бастыҥ учуутала» күрэх абсолютнай кыайыылааҕа буолбута.
Галина Юрьевна өрөспүүбүлүкэҕэ Үөһээ Бүлүү улууһун учууталларын ааттарыттан «Сыл бастыҥ» учуутала күрэххэ лауреат аатын ылан кэлбитэ. Ону нэһилиэкпитигэр «Бастыҥ учуутал» анал аатынан бэлиэтээбиттэрэ. 2022 сылга «Надежда Якутии» бэлиэнэн наҕараадаламмыта.
Алина Яковлева «Тымтык» эдкорпост, Ороһу.