Мин «Кэскил» үҥкүү ансаамбылыгар 2012 сыллаахха киирбитим. Учууталбыт Галина Прокопьевна аан бастаан киирэрбитигэр атахпытын тиэрэргэ , атахпыт төбөтүн тардарга, сиспитин тутарга үөрэтэн саҕалаабыта.
Араас хамсаныылары үөрэтэн , үҥкүү арааһын үҥкүүлээн саҕалаабыппыт. Онтон 2017 сыллаахха хореография оскуолатын бүтэрэн улахан ансаамбылга киирбиппит. Араас хабааннаах тэрээһиннэргэ, кэнсиэрдэргэ кыттааччыбыт уонна сайын аайы ыһыахха киирэн үҥкүүлээччибит. 2018 сыллаахха Калининград куоракка ыһыахтыы бара сылдьыбыппыт. Балтийскай муораны көрбүппүт, музейдарга сылдьыбыппыт. Аан бастакыбын улахан куоракка барбыт буоламмын олус сөбүлээбитим. Сайын 2019 сыллаахха «Артек» лааҕырыгар сылдьан араас омук оҕолорун кытта билсиһэн , астынан агай кэлбиппит.
Араас конкурстарга кыттан Лауреат, Гран при үрдүк аатын ыллыбыт. Быйыл үөрэхпитин бүтэрэн үгэс быһыытынан ыытыллар ансаамбылы бүтэрээччилэр кэнсиэрдээтибит. Уопсайа 4 кыыс буолан бүтэрдибит.
Күндү учууталбар Галина Прокопьевнаҕа маннык кэрэ кэмнэри оҕо сааспар биэрбиккэр, үҥкүү кэрэ эйгэтигэр үөрэтэн таһаарбыккар улахан махталбын тиэрдэбин! Ансаамбылым баар буолан мин араас сирдэргэ сылдьан кэллэҕим, элбэҕи, саҥаны биллим.
Алина Иппатьева,
XI кылаас,
Ньурба, Күндээдэ