Гражданскай сэрии дьоруойа Кеша Алексеев аатын сүгэр Хаптаҕай орто оскуолата элбэх үтүө үгэстэрдээх. Онтон биирдэстэрэ Учуутал күнүн бэлиэтээһин буолар.
Бу бэлиэ күн оҕолор учууталлары эҕэрдэлиибит. Бу эҕэрдэ эрдэттэн бэлэмнээх, үтүө тыллардаах, ырыалаах-үҥкүүлээх, хас биирдии учууталга бэйэ оҥоһук бэлэхтээх буолар. Маны тэҥэ Учуутал күнүгэр бэйэни салайыныы күнэ ыытыллар. «Пульс» актив көмөтүнэн педэтэрээт оҕолоро эрдэтэн быһаарынан ким ханнык предметы солбуйарын торумнаан учууталлары кытта быһаарсан, тиэмэлэринэн бэлэмнэнэллэр. Дьэ уонна алтынньы 5 күнүгэр дириэктэр, завуч, учуутал оҕолор көстүүм кэтэн дьоһуннаахтык үлэлэрин саҕалаатылар.
Бүгүҥҥү күҥҥэ дириэктэр Яна Григорьева, завуч Уран Мордовской, дириэктэри иитэр үлэҕэ солбуйааччы Ариан Кычкин, кылаас салайааччылар — 2-тэн 11-с кылаастарга диэри Дарина Григорьева, Надя Спиридонова, Нарыйа Ачикасова, Дарина Иванова, Аня Никифорова, Айсена Яковлева, Василена Дмитриева, Лера Готовцева, Юра Сидоров, Ренат Васильев, Күннэй Терентьева буоллулар. Дьуһуурунай учууталлар — Юра Сидоров, Ренат Васильев.
Бу күн «Кустук» медиа-студияттан Вадим Ефремов, Василена Дмитриева, оператор Айгылаан Кычкин үлэлээтибит.
Бу күн педэтэрээт «учууталлара» салайааччылар олус үчүгэйдик дьаһанан, биир да уруогу көтүппэккэ үлэлээтилэр. Оҕолорбутугар учууталлар махталлара улахан.
Василена ДМИТРИЕВА, XI кылаас, «Кустук» медиа-студия, Кеша Алексеев аатынан Хаптаҕай орто оскуолата, Мэҥэ Хаҥалас