Өрөспүүбүлүкэбитигэр ыытылла турар Олоҥхо декадатын чэрчитинэн, ахсынньы 3 күнүгэр олоҥхоһут Никита Семенович Александров-Ынта Никиитэ төрөөбүтэ 150 сылынан Дүллүкү орто оскуолатын үөрэнээччилэрэ уонна учууталлара «Көр Буурай» олоҥхону уһун тыыннаах уустаан-ураннаан ааҕыы түһүлгэтин ыыттыбыт.
Барыта 150 киһи кытынна. Бырайыак ааптара Дүллүкүтээҕи култуура уонна сынньалаҥ киинин уус-уран салайааччыта Наталья Кирилловна Петрова буолар. 9:30 чаастан олоҥхону ааҕыы үөрүүлээх арыллыыта буолла. Нэһилиэкпит баһылыга Н.П.Романов кэлэн уонна Олоҥхо научнай-чинчийэр институтун научнай үлэһитэ, ЯРОО «Ассоциация Олонхо» Президенэ Ф. В.Шишигина тэйиччиттэн сибээскэ тахсан эҕэрдэлээтилэр. Олохтоох поэт Н. В.Васильев — Харыйалаах Уола, оскуола директора Т. А. Егоров олоҥхоһут Ынта Никиитэ туһунан ахтыы оҥордулар. 10 чаастан олоҥхону тохтоло суох ааҕыы (марафон) саҕаланна. 2 кылаас оҕолоруттан саҕалаан олоҥхо ойуулаах-оһуордаах тыла саала иһин толордо. Олоҥхо сирин-уотун, дьоруойдарын ойуулааһын, бухатыыр атын айана, айыы уонна абааһы бухатыырын хабараан охсуһуулара, кыайыы өрөгөйө, орто дойдуга көҥүл, сырдык олох кэлиитэ бу «Көр Буурай» олоҥхоҕо уустаан-ураннаан ойууламмыт.
Биһиги кылааспыт салайааччытын Наталья Матвеевна Степанованы кытта 89 — 100 стр. диэри олоҥхо тылларын үөрэтэн аахтыбыт. Ааҕарга олоҥхо тыла олус уустук гынан баран, ис хоһооно, тутула олус интэриэһинэй, дириҥ өйдөбүллээх.
Бары сахалыы таҥастаах кэлэн, олоҥхону күргүөмүнэн ааҕан, түмсэн, биир дойдулаах олоҥхоһуппут Н. С Александров — Ынта Никиитэ айымньытын үйэтитиигэ кыттыбыппытынан киэн тутуннубут. Хас биирдиибитигэр Олоҥхо институтун туоһу суруга туттарылынна.
Айыына Петрова,
VIII кылаас, «Эрчим» медиа-киин,
Дүллүкү, Үөһээ Бүлүү