Чурапчыбытыгар Оҕо аймах уйгулаах ыһыаҕа иккис сылын буолан ааста. Ыһыах биир саамай кэрэ күрэҕинэн уһун суһуохтаахтары көрүү буолла. Кыргыттар суһуохтарын биэс бөлөххө арааран көрдүлэр: оҕо саадын иитиллээччилэрэ, алын кылаас, орто, улахан сүһүөх үөрэнээччилэрэ уонна улахан дьон.
Кыргыттар суһуохтарын «Бастакылар хамсааһыннара» Чурапчы улууһунааҕы специалиһа Егор Владимирович Холмогоров кээмэйдээтэ.
Уһуйаан саастаахтарга саамай уһун суһуохтаах кыыһынан Алиса Лаврова ааттанна. Кини суһуоҕун уһуна – 7 тутум. Кини кэнниттэн Айлаана Попова (6,3 тутум), Кэскилээнэ Макарова (6,3 тутум). Алын кылаастарга 9 тутум суһуохтаах Доминика Колодезникова, Амелия Романова (8,3 тутум), Милена Дьяконова (8,2 тутум) кыайыылааҕынан ааттаннылар; орто сүһүөхтэргэ Вилена Макарова (10,3), Диана Смирникова (10,2 тутум), Катя Посельская (9,2 тутум); улахан сүһүөхтэргэ Диана Баишева (9 тутум), Кира Саввинова (8,3 тутум), Сайаана Собакина (8,2 тутум). Улахан дьоҥҥо 11,1 тутум суһуохтаах Нарыйа Алексеевна Макарова, 11 тутум – Татьяна Сергеевна Бомбоева, 10,3 тутум – Айталина Андреевна Заболоцкая.
Кыайыылаахтар добун суругунан наҕараадаланнылар уонна “Күн тэгил” маҕаһыынтан сертификат туттулар.
Уһун суһуох күрэҕэр кыттыы, мин санаабар, улахан ситиһии. Тоҕо диэтэххэ, билиҥҥи үйэҕэ уһун суһуохтаах кыыһы ылбычча булан ылбаккын – үс кыыстан биир эрэ кыыс уһун суһуохтаах буолуон сөп. Онон билиҥҥи үйэҕэ чахчы, уһун суһуох диэн саха кыыһын саамай бастыҥ, мааны киэргэлэ.
Алена НОЕВА, VIII кылаас,
С.Д. Флегонтов аатынан Хадаар орто оскуолата, Чурапчы