Үөһээ Бүлүү улууһа төрүттэммитэ 88 сылын уонна биллиилээх общественнай-политическай деятель И.Н. Барахов төрөөбүтэ 125 сылын көрсө «Уһулуччулаах дьонноох Үөһээ Бүлүү» диэн оскуола саастаах оҕолорго квест-оонньуу ыытылынна. Манна 6-10 кылаастар кытыннылар.
Оонньууну Дүллүкү нэһилиэгин библиотекара Яна Борисова тэрийэн ыытта. 6 түһүмэхтээх сорудахтары толордубут. Бастакы түһүмэххэ кинигэ ыскаабыгар икки тэҥ кинигэни булаҥҥын иһин арыйдаххына, сорудах баарын булан толордубут. Иккис түһүмэххэ кэмбиэр булан, Николай Якутскай суруйбут кэпсээннэрин талбыппыт. 3 түһүмэххэ куйаар куодунан бэриэмэҕэ пазл таҥмыппыт. 4 түһүмэххэ эмиэ тэҥ кинигэни булан, иһигэр сөптөөх этиини устуохтаахпыт. 5 түһүмэххэ «Үөһээ Бүлүү» хаһыакка е-mail уонна хаһыат оҥоһуллар аадырыһын суруйбуппут. Онтон бүтэһик 6-с түһүмэххэ улууспут дэриэбинэлэрин уочаратынан суруйан эмиэ пазл курдук оҥорбуппут. Бу олус интэриэһинэй түһүмэхтэртэн таҥыллыбыт оонньууга кыттан, улууспут уонна кини чулуу дьонун туһунан элбэҕи биллибит.
Айыына Петрова, 6 кыл., Дүллүкү, «Эрчим» корпост, Үөһээ Бүлүү.