Өрөспүүбүлүкэ үрдүнэн ыраастааны, ыраас буолуу экологическай акция бара турарын өйөөн, Ороһу нэһилиэгин уһуйаанын оҕолоро акцияҕа көхтөөхтүк кытта сылдьаллар.
Иитээччилэр Валентина Васильевна Данилова, Саргылана Тимофеевна Дордосова: «Туһатыттан тахсыбыт, туттуллубат батареялары анал сыбаалкаҕа бырахпатаххына, мээнэ бырахтаххына, сытыаран, сиигирэн алдьанар, ол түмүгэр буору, ууну, салгыны киртитэр. Киртийбит ууну истэххинэ, баттаҕыҥ түһэр, тииһиҥ, тыҥаҥ, төбөҥ ыалдьар. Киһи эрэ буолбакка, тулалыыр от-мас, көтөр-сүүрэр кэхтэр. Биир батарейка 400 лиитэрэ ууну киртитиэн сөп», — диэн оҕолорго өйдөтүү үлэ ыытан тураннар, оҕолору «Сдай батарейку» акцияҕа көхтөөхтүк кытталларыгар ыҥырдылар.
Айтал Лебёдкин, Харысхал Тимофеев, Кристиан Терентьев оонньуур массыыналарын, таанкаларын батарейкалара бүппүтүн аҕалбыттарын туһунан тоһоҕолоон кэпсээтилэр. Уонна уһуйааҥҥа бииргэ сылдьар оҕолоро акцияҕа көхтөөхтүк кыттыбыттарын, кыра бөлөххө сылдьар оҕолор эмиэ акцияҕа кыттыбыттарын умнубакка эттилэр.
Ванесса ВАСИЛЬЕВА, «Тымтык» эдкорпост, Ороһу орто оскуолата.