Быйыл 2024 сыл Россияҕа — Дьиэ кэргэн, оттон Саха сиригэр — Оҕо саас сылынан биллэриллибитэ. Манна сыһыаран тыа сиригэр үлэлии-хамсыы, үүнэ-сайда олорор элбэх оҕолоох эдэр ыал биһиги В.Н.Оконешников аатынан Павловскай орто оскуолабытыгар музыка учууталынан үлэлиир Еремеева Диана Алесеевнаны кытта билсиэхпит.
— Үтүө күнүнэн, Диана Алексеевна, баһаалыста дьиэ кэргэнин туһунан билиһиннэр.
— Биһиги 3 оҕолоох Еремеевтар диэн сэмэй саха ыала буолабыт. Ходоро нэһилиэгиттэн төрүттээхпит. Нөөрүктээйи нэһилиэгэр дьиэ-уот тэринэн олохсуйан олоробут. Аҕабыт Владислав Петрович саха сирин тимир суолун тэрилтэтигэр улахан уйуктаах массыынаҕа эппиэтинэстээх суоппар. Мин бэйэм В.Н.Оконешников аатынан Павловскай орто оскуолатыгар музыка кэрэ эйгэтигэр оҕолору уһуйабын. Күүтүүлээх улахан кыыспыт Туяна 4 “а” кылааска ситиһиилээхтик үөрэнэр. Үөрэҕин таһынан бэйэтин сайыннаран араас кружоктарга сөбүлээн сылдьар. Ордук уруһуйдуурун, эт-хаан өттүн сайыннарар волейбол уонна туризм дьарыктарыгар сылдьар. Орто оҕобут эрэлбит уолбут Володя быйыл 2 кылаас үөрэнээччитэ буолла. Сүүрэн-көтөн мээчик тэбэн футбол дьарыгар сөбүлээн сылдьар. Мааны кыра кыыспыт Элиза Мичээр оҕо уһуйаанын подготовительнай группатын иитиллээччитэ. Ыллаан-туойан, аныгы араас хамсаныылаах үҥкүүлэри уҥкүүлээн барыбытын үөрдэр.
— Тыа сиригэр олорор тоҕо ордугуй?
— Бастатан туран, бэйэбит тыа сиригэр уотугар улааппыт дьон буолабыт. Тыа сиригэр олох тэтимэ куорат олоҕуттан уратылаах, манна киһи холкутук, ыгылыйбакка сылдьар дии саныыбын. Дэриэбинэҕэ ыраас салгынынан тыынабыт, сир аһын астыыбыт, бултаан-алтаан айылҕалыын алтыһабыт. Оҕолор тиэргэннэригэр тахсан дуоһуйа, астына оонньууллара туохтааҕар да ордук.
— Билигин оҕолор нуччалыы кэпсэтэллэрэ элбээтэ. Онно эн санааҥ?
— Тыа сиригэр олорор биир улахан уратыта ийэ тылбытынан күннэтэ дьону кытта кэпсэтэрбит буолар. Оҕолорбутун төрөөбүт тылларыгар сыһыары тутан иитэбит. Ыраастык саҥаралларыгар дьулуһабыт. Инникитин олохпутугар омук быһыытынан сайдарбытыгар улахан суолталааҕын өйдөөн үөрэтэбит. Төрөөбүт тылын билэр норуот омук быһыытынан инникилээх буоларын иҥэрэбит.
— Оҕону иитэргэ туохха болҕомто уураҕытый?
— Бастатан туран, чөл туруктаах, эт-хаан өттүнэн сайдыылаах буолалларыгар болҕомто уурабыт. Чиэһинэй, дьону кытта элэккэй, оҥорор үлэлэрин тиһэҕэр тиэрдэр, үлэһит сүрэхтээх, үөрэхтээх олоххо ситиһиилээх үтүө мааны дьон буола улааталларын баҕарабыт.
Павловскай орто оскуолатын медиа киинэ