Ыам ыйын 21 күнүгэр «Кыччыгый Аан» сиригэр 5-8, 10 кылаастар икки ардыларыгар ыытыллар 52-с «Школа безопасности» туристическай слет буолбута. Бу сылга миигин хамаандаҕа талбатахтара, ол иһин ас бэлэмнииргэ, палатка хомуйарга, иһит сууйарга, көмө буола сылдьыбытым, ол бириэмэҕэ биһиги оҕолорбут күрэхтэһэ сылдьыбыттара.
Сарсыарда 9:30 чааска туризмныыр сирбитигэр бастакынан кэлэммин, үчүгэй миэстэ булан, ыраастаан, кэтэһэн олорбутум, онтон оҕолорум кэлбиттэрэ.
Сотору соҕус дьүүллүүр сүбэ кэлэн бэрэбиэркэлээбитэ. Палаткабыт хайдаҕын уонна төһө ыраас сиргэ олорорбутун. Улахан Аантан 3 км тэйиччи сытар сиргэ диэри туристар араас сорудаҕы оҥоро-оҥоро сүүрэн тиийбиттэрэ, онно тиийэн спортивнай ориентирование, викторина, «Полоса выживания», бивуак диэн түһүмэхтэргэ кыттыбыппыт.
Онтон түмүк тахсыбыта. Орто звеноҕа уопсай түмүгүнэн 7-с кылаас кыайыылаах буолбута, иккис миэстэҕэ биһиги, алтыстар, үһүс 5-с кылаас буолбута. Улахан кылаастарга 8 кылаас маҥнайгы миэстэ, 10 кылаас 2-с миэстэ буолбуттара. Күнү быһа айылҕаҕа оскуоланан бары сылдьан олус сынньаммыппыт, волейболлаан, оонньоон, хаартыскаҕа түһэн, бэртээхэй күн ааспыта.
Аны 1-4 кылаас үөрэнээччилэригэр туризм ыытыллыа, онно мин хаартыскаҕа түһэрээччи быһыытынан кыттабын.
Аман ЕРЕМЕЕВ,
М.Е. Васильева аатынан 2-с Малдьаҕар
орто оскуолатын 6 кылааһын үөрэнээччитэ.