«Манчаары оонньууларын» үс төгүллээх кыттыылааҕа, Ньурбаттан сылдьар финансист идэлээх Ньургун Семенов хабылыкка, хаамыскаҕа муҥутуур кыайыылаах буолла. Кини аан бастакы «Манчаары оонньууларыгар» 2017 с. Үөһээ Бүлүүгэ кыттан үһүс буолбута, 2021 с. Горнайга иккис миэстэни ылбыта уонна бу быйыл үһүстээн кыттар «Манчаары оонньуулара» кыайыыны аҕалла.
Ньургун Семенов сааһа 20-тэ, бэйэтэ Ньурба улууһугар үп-харчы управлениетыгар сүрүннүүр специалиһынан үлэлиир. Кини хабылыкка, хаамыскаҕа өрөспүүбүлүкэ чөмпүйүөнэ, ону бу үһүс оонньууларыгар өссө төгүл бигэргэттэ. Тус көрдөрүүтэ — 3,13,50.
— Быйыл олунньу ыйга путевка былдьаһарбытыгар, онно бэһис миэстэ буолбутум уонна муҥутуур кыайыылаах аатын ылбытым. Хабылык, хаамыска күрэхтэһиилэрэ кэнники бириэмэҕэ сайдан эрэллэр, илин-кэлин түсүһээччилэр элбээтилэр. Аҥардас биһиэхэ, эдэр ыччат ортотугар, аҕыс маастардаахпыт. Урут оҕолорго оонньуу сылдьан наһаа оннук улахан илин-кэлин түсүһүү суох этэ, үс иһигэр киирэргэ арыый боростуой буолара. Быйыл күрэс улахан уонна наһаа ыарахан буолбут диэн сыаналыыбын. «Манчаары оонньууларыгар» хайаан да быйыл бастакы миэстэ ылыахтаахпын диэн сыал-сорук туруоруран кэлбитим. Дьарык кытаанах этэ, күрэх бөҕө тэриллибитэ, сүүмэрдээһин бөҕөтүн ааспытым, — диэн кэпсиир хабылыкка, хаамыскаҕа эр дьоҥҥо муҥутуур кыайыылаах Ньургун Семенов.
Онтон кэрэ аҥаардарга хабылыкка, хаамыскаҕа муҥутуур кыайыылааҕынан Мэҥэ-Хаҥалас спортсменката, быйыл оскуолатын бүтэрбит Аэлита Алексеева буолла. Кини көрдөрүүтэ — 2,56,13.
Саха Өрөспүүбүлүкэтин хабылык, хаамыска федерациятын бэрэсидьиэнэ Ольга Григорьева сахалыы остуол оонньуулара улуус-улуус аайы киэҥник тарҕаммыттарын бэлиэтиир уонна инникитин өссө сайдарыгар эрэллээх:
— Хас биирдии саха киһитэ хаһан эмит хабылыгы, хаамысканы илиитигэр тутан, оонньоон көрбүт, ол эбэтэр саатар туораттан көрөн сэҥээрбит буолуохтаах. Хабылык, хаамыска былыр-былыргыттан биһиги тыйыс тымныы дойдубутугар, саха балаҕанын иһигэр, көмүлүөк оһох иннигэр, өбүгэлэрбит олоҥхону истэ-истэлэр, бэйэ-бэйэлэрин кытары сэлэһэ-кэпсэтэ, тымныы киэһэлэри оонньоон-көрүлээн атаараллара. Бастакы хабылыгы талахтан быһан эбэтэр мастан кыһан оҥороллоро.
Оннооҕор «Дьулуруйар Ньургун Боотур» олоҥхоҕо «хабылыктаан ханыаластылар, хаамыскалаан сырҕаттылар» диэн тыллар бааллар. Бу түҥ былыргы көрүҥ фольклорбутугар эмиэ көстө сылдьар.
Саха төрүт оонньуута хабылык, хаамыска Сахабыт сирин Олимпиадатыгар, «Манчаары оонньууларыгар», күрэс быһыытынан киирэ сылдьар. Ол аата киһи доруобуйатыгар, дэгистэр спортсмен буоларыгар даҕаны сүрдээх улахан оруоллаах уонна эт-хаан, өй-мэйии үлэтин сайдыытыгар сүрдээх туһалааҕа дакаастанан турар.
XII-c үйэлэри уҥуордаан кэлбит остуол оонньуулара хабылык, хаамыска саамай киэҥник тарҕаммыт, бэйэлэрин суолталарын сүтэрбэккэ, симэлийбэккэ илдьэ сылдьаллар уонна эргиччи туһалааҕынан, ким баҕарар оонньууругар табыгастааҕынан биллэллэр.
Хаамыскалааҥ, хабылыктааҥ эт-хаан, өй-санаа өттүнэн сайдыҥ!
Бэлэмнээтилэр Стас Попов, Снежана Яковлева.
Устуу, таҥыы Авдей Неустроев.
«Кэскил» оҕо пресс-киинэ.
keskil14.ru