Соторутааҕыта Ваня Потапов “Туман” ырыатынан Кэрэчээнэ уонна Кэскилээнэ ТУПРИНАЛАР Инстаграмы «хайа тартылар». Биир күн иһигэр видеоны 12 тыһыынча киһи көрбүтэ, барыбытын да соһутта. Дьэ, кимтэн кииннээх, хантан хааннаах кыргыттарын сиһилии билсиэххэ.
Толору ааттара: Кэрэчээнэ уонна Кэскилээнэ ТУПРИНАЛАР.
Саамай сөбүлүүр артыыстара: Шакрукх Кхан – индийскэй киинэ артыыһа.
Спортивнай таҥастартан ордороллоро: PUMA.
Зодиактарын бэлиэтэ: КҮРҮЛГЭН.
Сөбүлээн сиир фрукталара: банаан.
Ханнык баҕарар сахалыы киинэлэри сэргээн көрөллөр.
Олохторугар суолдьут сулус оҥостор этиилэрэ: «Бэйэҕин кыайыыга угуйар буоллаххына, олоххор ситиһиилээх буолуоҥ!»
Кыргыттар тус олохторо
1999 сыл олунньу 15 күнүгэр Анаабыр улууһун Үрүҥ Хайа бөһүөлэгэр икки игирэ кыыс күн сирин көрбүтэ. Туприннар дьиэ кэргэн күүтүүлээх оҕолорун Кэрэчээнэ уонна Кэскилээнэ диэн ааттаабыттара. Кинилэр бииргэ төрөөбүт сэттиэлэр. Ыал улахан оҕолоро. Бэйэлэрин курдук биэс кэрэчээн балтылаахтар.
Кэрэчээнэлээх Кэскилээнэ биэбэйиктэн саҕалаан, V кылааска диэри Хаҥалас улууһун Покровскай куоратыгар аҕаларын эдьиийигэр олорбуттара. Ол кэннэ VI-VII кылаастарга Анаабыр улууһун Үрүҥ Хайа орто оскуолатыгар үөрэммиттэрэ. Спорка уһулуччу дьоҕурдаахтарын төрөппүттэрэ таба көрөн, Сунтаардааҕы спортивнай оскуолаҕа үөрэттэрэ ыыппыттара. Кыргыттар иккиэн волейболунан дьарыктаммыттара. Кэскилээнэ көҥүл тустуунан үлүһүйэн барбыта. Билигин да өрөспүүбүлүкэҕэ ыытыллар күрэхтэргэ куруук ситиһиилээхтик кыттар.
Ол курдук бэйэлэрин спорт хайысхатыгар суолларын булбут кыргыттар оскуолаларын Үрүҥ Хайаҕа бүтэрбиттэрэ. Онтон Дьокуускайдааҕы Уу тырааныспарын институтугар үөрэнэ киирбиттэрэ. Билигин III куурус устудьуоннара.
Кыргыттарга ыллыыр дьоҕур кыра эрдэхтэриттэн баар эбит. Төрөппүттэрэ иккиэн ырыа куттаах дьон. Ол иһин да оҕолоругар бэрилиннэҕэ.
Инстаграм эйгэтигэр
Кэскилээнэ уонна Кэрэчээнэ Инстаграм ситимигэр киирбиттэрэ номнуо түөрт сыл буолбут. Бэйэлэрин тус олохторун кэпсиир хаартыскалары, видеолары угаллар. Спорт эйгэтигэр чугас буоланнар, доҕотторо үгүс.
Уопсайдарыгар олорон устубут ырыаларын Инстаграм ситимигэр укпуттарын кэннэ, сурутааччыларын ахсаана икки бүк үрдээбит. Видеолара араас бөлөхтөргө тарҕанан, үгүс киһи сэҥээрдэ. Ураты куоластаах, номоҕон дьүһүннээх, көрсүө-сэмэй кыргыттар сүгүрүйээччилэрэ элбиир.
Кыргыттар билигин Инстаграм нөҥүө “Voice_sakha” диэн ырыа куттаахтар бөлөхтөрүгэр күрэххэ кытта сылдьаллар. Онно Игорь Егоров “Билбэтэҕим” ырыатынан, билиҥҥи туругунан, бастаан иһэллэр.
Ырыа кэрэ, алыптаах эйгэтэ Кэрэчээнэлээх Кэскилээнэни абылыыр. Игирэлэр, хомойбут, хоргуйбут түгэннэригэр ыллаатахтарына, дууһалыын чэпчииллэр, сирэйдиин-харахтыын сырдыыллар. Инстаграм ситимигэр аадырыстара:
@kerebykere уонна @twoprinaksk.
Балаһаны Иннокентий ВЛАДИМИРОВ бэлэмнээтэ.