Владик Потапов, Ф. Г. Охлопков аатынан Майа орто оскуолатын VIII кылааһын үөрэнээччитэ, кыра эрдэҕиттэн араас конструктордарынан, “Лего” оонньуурунан оонньуур буолан, ол кини инникитин талан ылар хайысхатыгар сабыдыаллаах буолбут. Бэйэтэ этэринэн, ол иһин техническай наука өттүгэр тардыһар буолбута. Владик саҥаны толкуйдаан онорорун, айарын сөбүлүүр. Маны таһынан, «Болот» диэн байыаннай куруһуокка утумнаахтык дьарыктанар.
— Быйыл биһиги оскуолабыт «Точка роста» диэн федеральнай ситимҥэ киирдэ. Ол иһинэн үлэлиир «Видеопроизводство», «Медиажурналистика» куруһуоктарга дьарыктанабын.
«Кэскил» хаһыат ыҥырыытынан «Сосновый бор» лааҕырга кэлбиппиттэн олус үөрэбин уонна махтанабын. Биһиги этэрээппит «ЭКО АПП» диэн мобильнай сыһыарыы (приложение) оҥоро сылдьабыт. Туһаныллыбыт пластигы хайдах туһаҕа таһаарыахха сөбүн туһунан лайфхактары, судургу ньымалары толкуйдуубут. Холобур, пластик бытыылканы туттардахха, эйиэхэ «эко-койн» диэни биэрэллэр, ону эн бааҥҥа баран, харчыга эргитэҕин. Оннук буоллар, олус үчүгэй буолуо этэ – дьон бары пластигы хомуйа сылдьыахтара, ханна да быраҕыахтара суоҕа этэ!
Өссө биир мобильнай сыһыарыы-оонньууну толкуйдаатыбыт: пластигы пластикка, тимири тимиргэ, кумаагыны кумааҕыга наардаталыыгын. Олус интэриэһинэй сыһыарыы буолан тахсыа диэн эрэнэбин!
“Сосновый бор” лааҕырга саамай сөбүлээбит тэрээһиним — «Суперинтуиция» диэн оонньуу. Манна академияларынан «Один факт о вожатом» оонньуу ыйытыыларыгар хоруйдаатыбыт. Иккис, «Узнай по фотографии», түһүмэххэ кыра оҕо эрдэҕинээҕи хаартыскаларбытын көрдөрбүттэринэн ким буолуохтааҕын таайа оонньоотубут.
«Суперинтуиция» тэрээһиҥҥэ үһүс академиялар кыайдылар. Бэйэ-бэйэни үчүгэйдик билсэргэ, доҕордуу буоларга олус үчүгэй, интэриэһинэй оонньуу эбит.
Инники олохпун АйТи эйгэтин, компьютернай графиканы кытары ситимниир санаалаахпын. Ол иһин бу лааҕыр миэхэ элбэх туһалаах өйү-санааны биэрдэ, билиим эбилиннэ.
Ааптар: Таисия Алексеева