Тоҕо эбитэ буолла, тыа сирин оҕолоро, кэтээн көрдөххө, ордук дэгиттэр сайдыылаахтар, талааннаахтар да диэххэ сөп. Барыны бары сатыыллар. Ылан көрүҥ, бу биһиги эдкорбутун Алик Пахомову. Кини суруйар-айар, ыллыыр-үҥкүүлүүр, волейболлуур, бултуур!
П.И.Яковлев аатынан Амма-Наахара орто оскуолатыгар элбэҕи билиэн-көрүөн баҕалаах, көхтөөх оҕолор элбэхтэр. Олортон биирдэстэринэн X кылаас үөрэнээччитэ Альберт Пахомов буолар. Альберт оҕолор бэйэни салайыныыларын тэрилтэтигэр лидер буолар. Тэрилтэ чилиэннэрэ оскуола тэрээһинин бэйэлэрэ ыыталлар, бэрээдэги көрөллөр, кыра оҕолорго сүбэ-ама буолаллар. «Кэскил» уонна «Амма олоҕо» хаһыаттарга ыстатыйа суруйаллар, тэттик видеолары, киинэлэри усталлар, айылҕа дьикти-кэрэ көстүүлэрин түһэрэллэр.
Альберт бастыҥ спортсмен, волейболунан сөбүлээн дьарыктанар, саахыматтыыр. Дьиэ кэргэнигэр оҕолортон улаханнара, балтын уонна быраатын бүөбэйдиир, көрөр. Аҕатын кытта Амма өрүстэригэр балыктыыллар. Аны уолбут өссө гитараҕа оонньуур, ыллыыр, бэйэтэ айбыт ырыалаахх. Үҥкүүлүүрүн туһунан киһи этэ да барбат).
Альберт Пахомов, (Амма-Наахара, Амма):
— Дьокуускайдааҕы “Сосновый бор” сынньалаҥ уонна чэбдигирии киинигэр “Цифровое поколение” симиэнэҕэ 300–чэкэ оҕо Саха сирин араас муннуктарыттан кэлэн үөрэнэн, сынньана сылдьабыт.
Мин Арсен Аргуновтыын Амма улууһун П.И.Яковлев аатынан Амма-Наахара орто оскуолатыттан кэлбиппит. Иккиэн X кылааска үөрэнэбит. Бэһис кылаастан оскуолабыт иһинэн үлэлиир “Аартык” эдэр кэрэспэдьиэннэр постарыгар дьарыктанабыт, салайааччыбыт — оскуолабыт бибилэтиэкэрэ Надежда Аркадьевна.
«Цифровое поколение» симиэнэҕэ оҕолор бөлөхтөргө арахсан, бырайыак толкуйдаан көмүскүөхтээхпит. Биһиги үс бырайыагы толкуйдаатыбыт: паарка, күн уотунан барар светофор, күнү-дьылы көрдөрөр дисплейдээх түннүк. Биһиги бөлөхпүт иһинэн программист, менеджер, дизайнер хайысхаларын таламмыт, тус-туспа соруктаах үлэлиибит. Маннык бырайыактары оҥорон, биһиги элбэҕи биллибит, программирование хайысхатынан үлэлииргэ үөрэннибит.
Хас биирдии оҕо бэйэтин толкуйун, санаатын, көрүүтүн этэн, бырайыакпыт сайдарыгар, олоххо киирэригэр кыһаллар.
Маннык, биир бөлөххө түмсэн, кэллэктиипкэ үлэлииргэ үөрэнэбит, сайдабыт, бэйэ-бэйэбититтэн саҥа билиини ылабыт. Түргэн тэтимнээх аныгы үйэҕэ маннык бырайыактар олус наадалаахтар. Билиҥҥи олох ирдэбилинэн АйТи технология сайдан, тупсан иһиэхтээх.
Күүстээх, дьаныардаах үлэнэн айыллан тахсар бырайыактар көмүскээһиннэригэр тобуллаҕас толкуйу, үтүө түмүгү баҕарыам этэ.
Ааптар: Таисия Алексеева