Мин төрүттэрим Трофимовтар – үлэһит аймах. Төрүччүнү үөрэтии — хас биирдии киһиэхэ, кини дьиэ кэргэнигэр үрдүк суолталаах.
Мин хос эбэм Вера Дмитриевна Фёдорова Орджоникидзевскай оройуоҥҥа 2-с Малдьаҕар нэһилиэгэр 1928 сыл олунньу 15 күнүгэр бастакы оҕонон төрөөбүт. Бииргэ төрөөбүт уоннар. 1938 сыллаахха 10 сааһыгар «Куоһаҕас» алааска оскуола арыллан, бастакы кылааска үөрэнэ киирбит. Ол гынан баран, сэрии кэмигэр ситэ үөрэммэккэ, тыа хаһаайыстыбатын ыарахан үлэтигэр эдэриттэн үлэлиир. 9 оҕо ийэтэ.
Бастакы уола Валентин Ильич Трофимов 1972 сыллаахха 8 кылаастаах оскуолатын бүтэрэн, күн бүгүҥҥэ диэри тыа хаһаайыстыбатын эйгэтигэр үлэлии сылдьар. Кини кэргэнэ — Римма Еремеевна Трофимова, 38 сыл үлэ ыстаастаах, онтон 15 сыл ыанньыксытынан, 23 сыл техник осеменаторынан үлэлээбит.
Валериан Ильич Трофимов – Булгунньахтаах уонна Улахан Аан сопхуостарыгар 23 сыл үлэлээбит. Пудова Марфа Павловна тэрилтэтигэр 21 сыл тырахтарыыстаабыт.
Владимир Ильич Трофимов — оскуола кэннэ аармыйаҕа сулууспалаан баран, сопхуоска тырахтарыыһынан үлэлээбитэ.
Валентина Ильична Трофимова — 1976 сыллаахха оскуоланы бүтэрэн баран, ыанньыксытынан үлэлиир. Куоһаҕас фермаҕа 42 сыл ыанньыксытынан үлэлээбит. Иккис сылын “Бөртө” сылгы собуотугар үүт тутааччынан үлэлии сылдьар.
Спиридон Ильич Трофимов — оскуола кэнниттэн аармыйаҕа сулууспалаабыта, онтон сельпоҕа хачыгаарынан үлэлээбитэ.
Екатерина Ильична Сакердонова – 1993 с. ЖКХ тэрилтэтигэр кассирынан үлэтин саҕалыыр. Онтон олохтоох дьаһалтаҕа кассир-бухгалтерынан, ол кэннэ Кытыл Дьураҕа олохтоох дьаһалтаҕа бухгалтерынан киирэр. 2002 сылтан оскуола бухгалтерынан биэнсийэҕэ барыар диэри үлэлиир. Билигин оскуолаҕа повар.
Евдокия Ильинична Трофимова — оскуоланы бүтэриэҕиттэн тыа хаһаайыстыбатын эйгэтигэр үлэлиир. Тракторист-машинист диэн идэлээх. Өктөмҥө биир сыл үөрэммит. Ыанньыксытынан 30-тан тахса сыл, аҕыйах сыл үүт пуунугар сылдьыбыт, билигин бороон көрөр.
Прокопий Ильич Трофимов — оскуола кэннэ аармыйаҕа сулууспалаабыта, ол кэннэ сопхуоска электригинэн үлэлээбитэ.
Александр Ильич Трофимов — оскуола кэннэ аармыйаҕа сулууспалаабыта, онтон сопхуоска тырахтарыыстаабыта, оскуолаҕа эмиэ тырахтарыыһынан үлэлээбитэ.
Трофимовтар аймах уопсайа тыа хаһаайыстыбатын эйгэтигэр 497 сыл, сүөһү көрүүтүгэр 260 сыл үлэлээбиттэр.
Саха оҕото үгэһин умнубакка, төрүттэрин, аймахтарын кэрэ холобурдарынан үлэни өрө тутан иитиллэн тахсыахтаах. Аймахтарын билэр уонна үөрэтэр оҕо дьиэ кэргэнинэн киэн тутта улаатар. Биһиги аймахтан таайдарбыт бары аармыйаҕа сулууспалаабыттар. Трофимовтар аймах — сүрүннээн тыа хаһаайыстыбатын үлэһиттэрэ.
Сахалина Артамонова,
М.Е. Васильева аатынан 2-с
Малдьаҕар орто оскуолатын
VI кылааһын үөрэнээччитэ