ССРС суруналыыстарын сойууһун чилиэнэ, ССРС бэчээтин туйгуна, лирик-поэт, суруйааччы, поэт, суруналыыс, артыыс, Муома орто оскуолатын 1964 сыллаахха бүтэрбит улууспут киэн туттар дьоһун киһитэ Тихон Егорович Черемкин-Толомон баара буоллар быйыл сэтинньи 11 күнүгэр 80 сааһын туолбут буолуо этэ. Бу бэлиэ күҥҥэ анаан «Толомон, эн үтүө ааккар…» диэн литэрэтиирнэй киэһэ оскуолабытыгар ыытылынна.
5-11 кылаас үөрэнээччилэрэ суруйааччы хоһооннорун ааҕан күрэххэ кытыннылар. Өрөспүүбүлүкэҕэ аатырбыт “Ийэҕэ махтал” диэн ыллам ырыаны нарын-намчы кыргыттар иэйиилээхтик ыллаатылар. Оскуолабыт айар куттаах үлэһитэ Василий Аммосов уонна «Дархан» уолаттар ансаамбыллара (сал. Винокурова С.Е.) «Сааскы үөрүү» диэн ырыаны толорон, көрөөччүлэри үөртүлэр. Тихон Толомон олоҕун, айар үлэтин туһунан оскуолабыт библиотекара Л.С. Слепцова толору кэпсээтэ, ону сэргэ суруйааччы араас түгэҥҥэ түспүт хаартыскаларынан быыстапката, презентацията дьон болҕомтотун тарта. Литэрэтиирнэй киэһэни саха тылын, литературатын, култууратын учууталлара С.Е. Винокурова, Т.И. Данилова иилээн-саҕалаан ыыттылар.
Тихон Толомон айымньыларын үйэтитэн оскуолабыт оҕолоро үгүс хоһооннорун аахтылар, ырыаларын биллилэр, суруйааччы туһунан иһиттилэр. Хоһоон ааҕыытын күрэҕин түмүгүнэн кыайыылаахтарынан Альбина Терехова (5-а), Максим Никулин (6-б), Володя Мончурин (9-а), Дьулус Крупышев (9-б), Дима Федоров (11-а) буоллулар. Уопсайа 19 оҕо Толомон айымньыларын дорҕоонноохтук аахтылар. Бөлөх аайы хастыы да оҕо иккис-үһүс миэстэни ылан добун суругунан бэлиэтэннилэр, үөрүүлэрэ үрдээтэ.
Толомоҥҥо аналлаах тэрээһини олус сөбүлээтим. Бары кыһаллан туран кытта сатаатылар, таҥастарын хоһооҥҥо сөптөөх гына таҥныбыттар этэ. Мин Толомон кинигэлэрин ааҕарбын сөбүлүүбүн, дьиэбэр сорох кинигэтэ баар. Биэчэргэ мин билэр хоһооннорум ааҕыллыбыттарыттан үөрбүтүм.
Уһун кэмҥэ хамсык ыарыы хааччаҕын кэнниттэн оҕолор быйыл сыанаҕа дьон иннигэр тахсаллара элбээн көхтөрө улааппыт, тэрээһиҥҥэ кыттыан баҕалаах элбэҕэ үөрдэр. Нэдиэлэ устата Толомоҥҥо анаан интэриэһинэй уруоктары оройуоннааҕы библиотека үлэһиттэрэ уонна оскуола түмэлин салайааччыта А.И. Никулина оҕолорго ыыппыттара.
Олохтоох суруйааччыбыт Т.Е. Черемкин-Толомон үтүө аата үйэлэри уҥуордаан ааттана туруо диэн эрэллээхпин.
Анжела СЛЕПЦОВА,
Муома орто оскуолатын 9-а кылааһын үөрэнээччитэ.