Аны сотору кэминэн Токиоҕа атырдьах ыйын 24 күнүттэн XVI Паралимпийскай оонньуулар саҕаланыахтара.
Арассыыйа Паралимпийскай кэмитиэтин хомуур хамаандатыгар биһиги кыргыттарбыт: харбааһыҥҥа Анастасия Диодорова, оҕунан ытыыга Степанида Артахинова, волейболга Алена Дмитриева киирбиттэрин туһунан иһитиннэрэн турабыт.
СӨ Ил Дархана Айсен Николаев спортсмен кыргыттары кытары быһа сибээскэ тахса сырытта. «Эһиги хас биирдиигит талан ылбыт көрүҥҥүтүгэр үрдүк көрдөрүүлээх, ситиһиилээх буолаҥҥыт, дойдубут сүүмэрдэммит хамаандатыгар киирдигит. Саха сирэ, бүттүүн Арассыыйа эһигинэн киэн туттар уонна эһиэхэ эрэнэр. Кыайыылаах-хотуулаах, улахан ситиһиилэрдээх дойдугутар этэҥҥэ эргиллэн кэлэргитин күүтэбит», — диэн кыргыттарга туһаайан тус санаатын эттэ.
Паралимпийскай оонньуулар үрүҥ көмүс призера, аан дойду уонна Европа чөмпүйүөнэ, Арассыыйа спордун үтүөлээх маастара Анастасия Диодорова быйыл харбааһыҥҥа улахан куотуһуу (конкуренция) баарын уонна биир дойдулаахтарын, чугас дьонун өйөбүлэ ордук наадатын бэлиэтээтэ.
Паралимпийскай оонньуулар боруонса призера, аан дойду таһымнаах спорт маастара, Арассыыйа спордун үтүөлээх маастара Степанида Артахинова билигин Владивостокка эрчиллэ сылдьарын туһунан кэпсээтэ. Кини, маннык ыарахан кэмҥэ быыс булан, көрсүһүүнү тэрийбиттэригэр махтал тылларын тиэртэ.
Европа чөмпүйүөнэ, Арассыыйа спордун үтүөлээх маастара Алена Дмитриева бүгүн, атырдьах ыйын 19 күнүгэр, Токиоҕа көтөрүн эттэ. «Олорон эрэн волейболлааһыҥҥа биһиги дойдубут хамаандата Кытай уонна Америка күүстээх хамаандаларын кытары күөн көрсөр бөлөххө киирдэ. Бастакы оонньуубут атырдьах ыйын 28 күнүгэр Кытай хамаандатын кытары буолар. Бу бөлөххө кыайыылаах таҕыстахпытына, балаҕан ыйын 5 күнүгэр буолуохтаах финалга киириэхтээхпит», — диэн кини иһитиннэрдэ.
Сахабыт сирин талааннаах, күүстээх, киэн туттар, холобур оҥостор кыргыттарбытыгар үрдүк ситиһиилэри, кыайыыны-хотууну эрэ баҕарабыт! Туохтан да толлубакка, чаҕыйбакка, иннигит хоту түһүнэн кэбиһиҥ!
Бэлэмнээтэ Анна СЛЕПЦОВА.