Балаҕан ыйын 10 күнүгэр Тааһаҕар оскуолатыгар «Точка роста» биология, химия уонна физика кабинеттарын аһыллыытын үөрүүлээх сиэрэ-туома буолла. Өрөспүүбүлүкэбит үөрэҕин уонна билимин миниистирин бастакы солбуйааччыта Алевтина Петровна Аргунова эҕэрдэтиттэн саҕаланна. Нэһилиэк баһылыгын солбуйааччы Ульяна Николаевна Григорьева, олохтоох дьокутааттар ааттарыттан Родион Алексеевич Осипов кэлэн эҕэрдэлээтилэр, сайдыыны баҕардылар. Кыһыл лиэнтэ быһыллыбытын кэнниттэн ыалдьыттар, оҕолор, учууталлар кабинеттары көрдүлэр-иһиттилэр.
Мин биология кабинетын волонтера буоллум. Оҕолор киирэн көрүөхтэрин иннинэ, бу тэрээһиҥҥэ анаан, микроскоп туруоран, оҕолорго арааһы барытын көрдөрдүм. Инфузория туфелкьаттан саҕалаан кумаар айаҕар тиийэ быһаардым, көрдөрдүм. Оҕолор уонна улахан дьон олус сэргээтилэр. «Бу маннык көстөр эбит» — дэстилэр.
Бу тэрээһин биһиги, оҕолор, физика, химия, биология уруоктарын дириҥэтэн үөрэтэрбитигэр көмө, ону таһынан чинчийии үлэтигэр сыстарбытыгар төһүү буолуохтара.
Саяна ГРИГОРЬЕВА, IX кылаас. Тааһаҕар, Бүлүү