Ахсынньы ый 19-21 күннэригэр нэһилиэкпит тэрилтэлэрин икки ардыгар волейбол күрэхтэһиитэ тэрилиннэ. Манна эр дьоннорго 4, кэрэ аҥардарга 4 хамаанда күөн көрүстүлэр. Олор истэригэр оскуолабыт үөрэнээччилэрэ эмиэ бааллар.
Кэнники сылларга хамсык ыарыынан сибээстээн күрэхтэһиилэр ыытыллыбатахтара быданнаабыт. Онон хамаандалар бары да оонньооботохторо ырааппыт.
Тыҥааһыннаах киирсиилэри, ыһыылаах-хаһыылаах ыалдьааччылары, тиритиилээх-хорутуулаах хамсаныылары умна быһыытыйбыт спорт саалата бу күннэргэ оргуйан олордо диэххэ сөп. Ыалдьааччылар оонньооччулардааҕар тыҥаан, долгуйан, тиритэн омос көрдөххө кинилэр күрэхтэспиттэрин курдук.
Оҕолор хамаандалара бэркэ оонньоотулар да буоллар, абалаахтык хоттордулар. Ол эрэн, ийэлэрин, аҕаларын утары оонньоон, хас биирдиилэрэ бэйэлэригэр күрэхтэһииттэн туох эрэ саҥаны арыйбыттара саарбаҕа суох. Бу ылбыт уопуттара инникитин уроук буолуо турдаҕа.
Түмүккэ кыайыылааҕынан эр дьоннорго ОДЬКХ хамаандата, оттон кэрэ аҥардарга оскуола үлэһиттэрин хамаандата буоллулар. Оттон 11-с кылаас үөрэнээччилэрэ Гея Винокурова уонна Арсен Винокуров «Бастыҥ оонньооччу» анал ааттары ыллылар, кубок туттулар.
И. Ноговицына,
Орто Халыма, Өлөөкө-Күөл б.