Бу күннэргэ биһиги кылаас таһынан ааҕыыга саха биир биллэр суруйааччытын – Тимофей Сметанин “Мэхээлэчээн булчут кэпсээннэрэ” айымньытын аахтыбыт, ырыттыбыт. Саха киһитэ ис иһиттэн бултка-алка сыһыаннаах, айылҕаҕа чугас, мындыр өйдөөх эбит диэн санааҕа кэллибит.
Оҕолор сэргэхтик санааларын үүллэһиннилэр.
Аман Кириллин, VII кылаас:
— «Кымырдаҕас эһэни кыайбыттаах» кэпсээнигэр мин олус дьиктиргээтим. Эһэ саамай адьырҕа, күүстээх кыыллартан биирдэстэрэ. Ол да буоллар, кыра кымырдаҕастар өйдөөх буолан, эһэни кыайбыттар. Бу кэпсээнтэн мин кулгааххар кымырдаҕас эбэтэр атын кыра үөн-көйүүр киирдэҕинэ, сылаас уу кутан таһаарыахха сөп эбит дии санаатым. Уонна аҥардас күүстээх эрэ буолбакка өйдөөх эмиэ буолуохха наада диэн.
Айыына Кириллова, VII кылаас:
— Мин Тимофей Сметанин кэпсээннэрин олус сөбүлээтим. Ордук «Эргэ балаҕан халҕанынан» уонна «куһу ураһаҕынан бултуурбут” диэни айымньылары интэриэһиргээн аахтым. Мэхээлэчээн хайдах бултуурун туһунан көрүдьүөстээхтик суруллубут. Төһө да сороҕор кутталлаах түбэлтэ таҕыстар, сытыы өйүнэн хотуулаах тахсыахха сөп. Өссө кини хорсунун эмиэ көрдөрбүт.
Лия Ефимова, VII кылаас:
— «Эргэ балаҕан халҕанынан» диэн кэпсээнтэн олус куттанным. Оҕолору эһэ өлөрө сатаата. Маннык кутталлаах түбэлтэлэр олоххо буолуохтарын сөп. Киһи булугас өйө кутталлаах кэмҥэ туһалыан сөптөөҕүн итэҕэйдим. Онтон «Кымырдаҕас эһэни кыайбыттаах» диэн кэпсээни ааҕан баран хомойдум. Мин эһэни аһынным. Кини хайаттан охтон, кутааҕа умайан өлбүтэ.
Артем Атласов, VII кылаас:
— «Этэрбэс чааркаан буолбуттаах” диэн кылгас кэпсээнэ наһаа үчүгэй. Кэпсээн тыла-өһө судургу,боростуой, өйдөнүмтүө. Тыаҕа сэрэхтээх,бэлэмнээх буолуохха наада диэн үөрэтэр.
Айта Чылбынова, VII кылаас:
— «Мэхээлэчээн булчут кэпсээннэрэ” диэн кылгас кэпсээннэртэн турар. Бу айымньыга оҕо саас, айылҕаны кытта киһи сибээһэ олус табатык көстүбүт. Айымньы тыла-өһө судургу эрээри, дириҥ ис хоһоонноох. Ааҕарга бэрт чэпчэки. Ааптар саха дьонун майгытын уонна дууһатын сөпкө арыйан көрдөрбүт дии санаатым.
17№-дээх оскуола, Дьокуускай
keskil14.ru