Быйылгы үөрэх сылыгар И.Н.Слепцов аатынан Кустуур орто оскуолатын IV кылааһы 3 оҕо, IX кылааьы 7 оҕо, XI кылааьы 5 оҕо бүтэрэр. Хас биирдии үөрэх дьыла биһиги оҕолорбутугар, учууталларбытыгар саҥа үктэллэри, сырдык аартыктары, үрдүк сыаллары туруорар. Тиһэх чуораан бырааһынньыга ону барытын түмүктүүр, үчүгэй үөрэнээччилэрбитин, спортка, научнай-практическай үлэҕэ, муусукаҕа ситиһиилээхтэри чиэстиир үөрүүлээх түмүк буолар. Экзаменнаах оҕолорбутугар үрдүк ситиһиилэри баҕара хаалабыт.
Саамай умнуллубат кэрэ кэм оҕо саас буолар. Оҕо сааһы санатан, выпускниктар ырыа, хоһоон, үҥкүү кэһиилээх эҕэрдэлээтилэр. Кырачаан балыстара, бырааттара, үгэс быһыытынан, выпусниктарга «Самолетик будущего» туттардылар.
Күндү оскуоланы бүтэрээччилэр, хас күн аайы билиигэ-көрүүгэ, саҥаттан-саҥаны арыйарга ыҥырар алтан чуораан эһигини олох киэҥ аартыгар эрэллээхтик үктэнэргитигэр, таба суолу тутуһан дьоһун дьон буоларгытыгар алгыы, эрэнэ лыҥкыначчы тыаһаата!
«Биракчаан» медиакиин
И.Н. Слепцов аатынан Кустуур орто оскуолата,
Эбээн Бытантай улууһа