М.Е.Васильева аатынан 2 Малдьаҕар орто оскуолатын 7 кылааһын үөрэнээччилэрэ кылаас салайааччытын Тимофеева Оксана Викторовнаны кытары Дьокуускай куоракка Саха театрыгар ыалдьыттаатылар.
Үүнэр көлүөнэ театра сэбиэскэй кэм суруйааччыта Михаил Шолохов уһулуччулаах кэпсээнинэн туруорбут «Киһи дьылҕата» испэктээкилигэр сылдьан санааларын маннык үллэһиннилэр.
Ильин Сарыал: «Мин театрга бастакыбын сырыттым. Театр олус улахан уонна киэҥ, кыраһыабай эбит. Испэктээкил буолан эрэр диэн элбэхтэ этэллэр. Артыыстар оонньуулларын сөбүлээтим. Оруолларын олус үчүгэйдик толороллор. Киһи итэҕэйэр, барыта дьиҥнээх, бу буола турар курдук».
Терентьев Ренат: «Саха театрыгар киирбиппитигэр киһи олус элбэх этэ. Куоракка театрга сөбүлээн сылдьаллар быһыылаах. Испэктээкил балтараа чаас курдук буолбута. Ол гынан баран киһи сылайбат, барыта интэриэһинэй буолан, туохха да аралдьыйбакка көрө олороҕун. Биһиги 9-10 эрээттэргэ олорбуппут. Барыта үчүгэйдик көстөр, иһиллэр этэ. Сүрүн оруолу толорбут артыыс оонньуурун ордук сөбүлээбитим. Кылааһым оҕолорун кытта сылдьыбытым үчүгэй этэ».
Кириллина Альмира: «Испэктээкил көрө олордохпутуна, сыанаҕа муоста хамсаабытыгар мин олус соһуйбутум. Сыаналарын үчүгэйдик киэргэппиттэр этэ. «Аҕаа!» дии-дии уол сүүрэн кэлбитигэр мин наһаа үөрбүтүм, долгуйбутум. Театрга сылдьар олус үчүгэй эбит. Биһиги бары сөбүлээбиппит».
Испэктээкилтэн киирбит үп барыта байыаннай дьайыыга сылдьар биир дойдулаахтарбытыгар барар. Ол туһунан Үүнэр көлүөнэ тыйаатырын уус-уран салайааччыта, СӨ норуодунай артыыһа, Арассыыйа култууратын үтүөлээх үлэһитэ Алексей Павлов испэктээкилгэ кэлбит көрөөччүлэргэ махталын биллэрэн иһитиннэрбит. Онон оҕолор эмиэ бэйэлэрин тус кылааттарын киллэрбиттэр.
Аҕа дойду Улуу сэриитигэр Кыайыы 80 сылыгар, Арассыыйаҕа Аҕа дойдуну көмүскээччи уонна Саха республикатыгар Ийэ дойдуну көмүскээччи сылларыгар, култуура тэрилтэлэригэр история өйдөбүнньүгүн сылларыгар анаан туруоруллубут «Киһи дьылҕата» испэктээкили көтүтүмэҥ.
«УОТ» медиакиин