Быйыл Сунтаар 1-гы №-дээх орто оскуолата 160 сааһын туолла. Үөрэнээччилэр оскуола үбүлүөйүн көрсө араас хоһооннору, өйтөн суруйууну суруйдулар.
Мин таптыыр оскуолам
Мин үөрэнэр оскуолам үс этээстээх, элбэх да элбэх түннүктэрдээх, мин санаабар үрдүк да үрдүк элбэх үктэллэрдээх кирилиэстээх, Сунтаар сэлиэнньэтин ортотугар турара саамай кыраһыабай көрүҥнээх таас дьиэ буолар.
Сарсыарда оскуола аанын аһан киирээт, дьуһуурунай харабыллар эҕэрдэлии көрсөллөр. Онтон биһиги сырдык, киэҥ көрүдүөр устунан хааман, этээстэринэн сырдык, ыраас кылаастарбытыгар үөрэнэ тарҕаһабыт. Биһиги кылааспыт оскуолабытыгар биир саамай тупсаҕай оҥоһуулаах кылаас, кылааспытын наһаа сөбүлүүбүт.
Оскуолабытыгар библиотека, спортивнай зал, актовай зал, остолобуой бааллар. Оҕолор саамай сөбүлээн сылдьар сирбит — спортивнай зал. Перемена кэмигэр уонна уруоктар кэннилэриттэн оҕолор волейбол, баскетбол оонньууллар уонна теннистииллэрин сөбүлүүллэр.
Оскуолабытыгар биир саамай сөбүлүүр сирбитинэн минньигэс, тотоойу астаах остолобуойбут буолар. Уһун переменаҕа оҕолор бары остолобуойга сырсабыт. Биһигини повардарбыт мэлдьи араас минньигэс астаах көрсөллөр.
Биһигини киэҥ билиилээх, үөрэхтээх үтүө үлэһит дьон буолан тахсарбытыгар кыһаллар киэҥ билиилээх учууталлар үөрэтэллэр. Арыт сүрэҕэлдьээн дьиэҕэ үлэни толорбокко, уруокка телефону көрө олорон хомотобут, кыыһырдабыт, кинилэри өйдөөбөппүт. Ону арааһа улаатан баран, үлэһит буоллахпытына эҥин, ситэри өйдүүрбүт буолуо дии саныыбын.
Мин ордук сөбүлүүр учууталларым — географияҕа үөрэтэр Аксиния Анатольевна уонна нуучча тылын уонна литературатын үөрэтэр Елена Афанасьевна. Кинилэр хаһан да оҕолорго кыыһырбаттар, наһаа үчүгэйдик, тиийимтиэтик өйдөтөллөр. Мин улааттахпына кинилэр курдук учуутал буолуохпун баҕарабын.
Мин оскуолабын наһаа таптыыбын. Сарсыарда аайы үөрэ-көтө үөрэнэ кэлэбин, каникул кэнниттэн үөрэнэ барарбын наһаа кэтэһэбин, оскуолабын ахтабын. Оскуолам мин санаабар иккис дьиэм курдук. Оскуолам миигин туох эрэ аптаах курдук тардар. Уруок кэнниттэн хаалан оҕолордуун кэпсэтэрбиттэн, оонньуурбуттан олуһун диэн астынабын.
Оскуолам быйыл сэтинньи 17 күнүгэр 160 сааһын туолла. Тапталлаах оскуолабын үбүлүөйгүнэн итиитик-истиҥник эҕэрдэлиибин! Тапталлаах оскуолам инникитин даҕаны үүнэ-сайда тур!
Люда Андросова, А.П. Павлов аатынан Сунтаар 1 №-дээх
орто оскуолатын 8-в кылааһын үөрэнээччитэ.