Сэтинньи 29 күнүгэр биһиги оскуолабытыгар үөрүүлээх күн буолан ааста. Тапталлаах оскуолабыт “Феникс” оҕо тэрилтэтин үрүҥ көмүс үбүлүөйүн, ону тэҥэ Сахабыт сиригэр “Хомус” күнүн бэлиэтээтибит, убаастабыллаах попечителлэрбитин, бииргэ үлэлэһэр тэрилтэлэрбитин кытта төгүрүк остуола тула муһуннубут.
Сарсыарда үөрэх күнэ оскуолабыт “Тэтим” фольклорнай куруһуогун иитиллээччилэрин хомуска дьүһүйүүлэринэн саҕаламмыта. Учууталлар, үөрэнээччилэр, оскуола үлэһиттэрэ хомус алыптаах, дьүһүйэр тыаһынан алгыстаммыттара. Бу күн радиорубканан иһитиннэриилэр, интерактивнай экран нөҥүө араас биэриилэр көһүннүлэр.
“Феникс” оҕо тэрилтэтэ 1997 сыллаахха сэтинньи 29 күнүгэр төрүттэммитэ. Сүрүн сыала-соруга: олоҕу таптыыр, көҥүл, талааннаах, салайар дьоҕурдаах оҕону иитэн-такайан таһаарыы буолар. Уопсайа биһиги оскуолабытыгар “Феникс” оҕо тэрилтэтигэр 578 үөрэнээччи баарыттан, сүрүн актыып 49 оҕоттон турар. Быйылгы үбүлүөйдээх сылга маҥнайгы кылаас оҕолорун «Феникс» оҕо тэрилтэтигэр киириилэрэ үөрүүлээх быһыыга-майгыга буолла. Уопсайа 80 үөрэнээччи оҕо тэрилтэтин чилиэннэрэ буолбуттарын туоһулуур анал мэтээллэри кэттилэр уонна андаҕар тылларын эттилэр.
“Феникс” тэриллиэҕиттэн оскуола коллектива, директордара өрүү күүс-көмө, өйөбүл буолаллара, оҕолору кытта биир санаанан салайтараллара. Эҕэрдэ тыл эттэ оскуолабыт дириэктэрэ Вера Аркадьевна Тимофеева. Үөрүүлээх үбүлүөйбүтүнэн эҕэрдэлии кэлбиттэрэ: араас сылларга үлэлээн- хамнаан кэлбит ураты айар дьоҕурдаах киэн туттар выпускниктарбыт, президеннарбыт Алексей Иннокентьевич Неустроев, “Майа сэлиэнньэтэ” Тыа сирин түөлбэтин Аҕа баһылыга, Павел Анатольевич Судико, Иван Гаврильевич Тимофеев аатынан Майа лицейын дириэктэрин советнига, Петр Егорович Иванов, “Фаворит строй” тутуу тэрилтэтин начальнига, Гаврил Иванович Иванов, “Фаворит строй” тутуу тэрилтэтин кылаабынай инженера. Кинилэр хас биирдиилэрэ “Феникс” үүнэригэр-сайдарыгар төһүү күүс буолбуттара, билиҥҥи кэнчээри ыччаппытыгар үтүө холобур, сүбэһит буолар дьоммут. Ону таһынан, бэйэлэрин эҕэрдэлэрин “Ларионовцы” Владимир Петрович Ларионов аатынан Майа орто оскуолатын, Иван Гаврильевич Тимофеев аатынан Майа лицейын уонна Иннокентий Гаврильевич Игнатьев аатынан Хара орто оскуолатын актыбыыстара үтүө тылларын, сэмэй бэлэхтэрин туттардылар. Үлэлии сылдьыбыт оҕо тэрилтэтин салайааччыларын ааттарыттан эҕэрдэ тылы оскуолабыт дириэктэрин үөрэх чааһыгар солбуйааччыта Олег Сергеевич Петров эттэ. Оҕолор бэйэлэрэ туруорбут кэнсиэрдэрин көрөөччү болҕомтотугар көрдөрдүлэр. Салгыы ыҥырыылаах ыалдьыттар, үөрэнээччилэр уонна учууталлар Хомус күнүгэр аналлаах челленджка кытыннылар, уопсай оһуохайга түмүстүлэр.
Эппиэтинэстээх күммүт биир сүрүн тэрээһининэн попечителлэрбитин, бииргэ үлэлэһэр тэрилтэлэрбитин кытта төгүрүк остуола тула мустубуппут буолар. Ол курдук, салайар Сэбиэт бэрэссэдээтэлэ Алексей Иннокентьевич Неустроев, «КУМИ» салайааччыта Дмитрий Иванович Аргунов, И.М. Сосин аатынан улуустааҕы бибилэтиэкэ дириэктэрэ Елизавета Семеновна Корнилова, “Чуораанчык” оҕо уһуйаанын сэбиэдиссэйэ Галина Валерьевна Захарова, улуустааҕы почта тэрилтэтин начальнига Варвара Афанасьевна Скрябина, урукку үөрэх сылларыгар үлэлии-хамсыы сылдьыбыт оскуолабыт президеннара Петр Егорович Иванов, Гаврил Егорович Иванов, убаастабыллаах попечителлэрбит Николай Николаевич Старостин, Заредина Алексеевна Сосина, Виталий Михайлович Пестряков, Татьяна Васильевна Сидорова, Евдокия Саввична Решетникова, Варвара Петровна Попова, Мария Владимировна Дмитриева, Олег Сергеевич Петров, Туйаара Николаевна Пинигина буолан истиҥ кэпсэтии, инникини торумнааһын, бииргэ үлэлиир хайысхалары ырытыһыы буолла. Оскуолабыт дириэктэрэ Вера Аркадьевна Тимофеева оскуола үлэтин-хамнаһын, попечителлэр хайа хайысхаҕа көдьүүстээх көмөнү оҥорбуттарын сырдатта, махталын тириэртэ. Дириэктэри научнай-методическэй үлэҕэ солбуйааччы Ньургуйаана Ивановна Скрябина оҕолор бырайыактарын туһунан кэпсээтэ, социальнай партнердарбыт, бииргэ үлэлэһэр тэрилтэлэрбитин кытта хайдах быһыылаахтык тэҥҥэ үлэлиирбитин сырдатта. Олус туһалаах уонна наадалаах көрсүһүү буолла диэн бэлиэтиибит. Биэчэрбитин түмүктүүр тэрээһининэн оҕолорго уоттаах-күөстээх дискотека буолла.
Оскуола оҕо тэрилтэтин сайдарыгар, сөптөөх суолун булунарыгар, үйэ чиэппэрин устата үлэлээн кэлбит уонна күн бүгүҥҥэ диэри сыраларын ууран туран үлэлии-хамсыы, айа-тута сылдьар бука бары коллегаларбытын, выпускниктарбытын, попечителлэрбитин, үөрэнээччилэрбитин өссө төгүл ис сүрэхтэн эҕэрдэлиибит. Үүнэ-сайда тур, тапталлаах «Феникс»-пыт тэрилтэтэ, саҥаттан саҥа арыйыылары, үрдүктэн үрдүк ситиһиилэри баҕарабыт!
«ОхлопковNews» Ф.Г. Охлопков аатынан Майа орто оскуолата.