Тохсунньу 16 күнүгэр Р.Г. Васильев аатынан улуустааҕы кыраайы үөрэтэр түмэлгэ ураты кэрэ, алыптаах Таҥха күнэ буолан ааста. Бу күн «Кэрэли» оҕону эбии үөрэхтээһин киинин оҕолоро түмэлгэ мустан, олус кэрэхсэбиллээх көрсүһүүгэ кытыннылар.
Көрсүһүү сүрүн ыалдьытынан «Сырдык айыы сыдьаайа» түмсүү салайааччыта, аҕам саастаах, киэҥ көрүүлээх Анна Иннокентьевна Климентова буолла. Кини оҕолору үөрэ-көтө көрсөн, атах тэпсэн олорон ирэ-хоро, аһаҕастык кэпсэттэ.
Тэрээһин икки сүрүн хайысхаҕа ананна: «Дьиктилээх-дьиибэлээх дьиҥ олоххо буолан ааспыт түбэлтэлэр» уонна «Айыылар киһи олоҕор». Анна Иннокентьевна бэйэтин баай билиититтэн үллэстэн, саха итэҕэлин кистэлэҥнэрин, Үрдүкү Айыылар суолталарын туһунан сиһилии кэпсээтэ. Биһиги олоххо чахчы буолбут сэргэх сэһэннэри истэн, туһалаах сүбэ-ама иҥэриннибит. Ону таһынан, Анна Иннокентьевна алгыһын истэн, дууһалыын ыраастанныбыт.
Кэрэли уонна түмэл сылын ахсын ыытар Таҥха ыйыгар аналлаах көрсүһүүлэрэ оҕолору төрөөбүт сирбит дьиктилээх устуоруйатын эрэ буолбакка, кини тыыннаах үгэһин, итэҕэлин билэргэ уонна ытыктыырга үөрэтэллэр. Кэпсэтии түмүгэр бары үөрэн-көтөн, өйдөбүнньүк видеоҕа уһулуннубут, хаартыскаҕа түстүбүт. Бу күн дьиҥнээх олохпутугар умнуллубат алыптаах, аптаах түгэн буолла.
Олус интириэһинэй көрсүһүү иһин түмэл исписэлииһигэр Охлопкова Ньургуяна Васильевнаҕа, бииргэ үлэлэспит, тэрийсибит «Кэрэли»оҕону эбии үөрэхтээһин киин «Музееведение» уонна «Мультимедийнэй журналистика» куруһуоктар салайааччыларыгар Гаврильева Л.И., Аргунова В.М., ыҥырыылаах ыалдьыкка Анна Иннокентьевнаҕа маанылаах кэпсээннэрин, дьикти түбэлтэлэрин, истиҥ алгыһын иһин барҕа махталбытын тиэрдэбит!
Светлана Лепчикова,
«Кэрэли» оҕону эбии үөрэхтээһин киинин «Мультимедийнэй куруһуок» иитиллээччитэ
keskil14.ru