Танда Саха сиригэр эрэ буолбакка, Арассыыйаҕа түөрт Геройдаах тыа сирин нэһилиэгинэн биллэр. Бүтүн дойду үрдүнэн аата-суола киэҥник биллэр нэһилиэк туох, хайдах үлэлии олороруй? Туох кыһалҕалааҕый? Туох ситиһиилэрдээҕий? Бу туһунан нэһилиэкпит баһылыгын Савва Иванович Егоровы кытта көрсөн кэпсэттибит.
– Үтүө күнүнэн, Савва Иванович, нэһилиэкпитигэр сайыҥҥы үлэ хайдах ааста?
– Үтүө күнүнэн! Биир улахан үлэбит диэн быйыл «Бороҕон-Танда» массыына айанын суолун оҥорууга үлэ саҕаланан, бара турар. Билиҥҥи туругунан, 10 килэмиэтир оҥоһулунна. 2027 сылга диэри бүтүөхтээх.
Сылын аайы күһүҥҥү, кыһыҥҥы ыйдарга биир улахан эппиэтинэстээх үлэнэн нэһилиэкпит үбүн-харчытын, бюджетын көрүү буолар. Эһиэхэ, оҕолорго диэн быһааран эттэхпинэ, ол аата кэлэр сыллааҕы үлэни былааннаан, харчыны тыыран, сөптөөх ыстатыйаларга киллэрэн, уган биэрии. Ол көрүллүбүт хайысхаларынан сыллааҕы үлэ ыытыллар. Нэһилиэк олохтоохторун көҕүлээһиннэрин өйүүр программаҕа (ППМИ) кыттаммыт, быйыл нэһилиэк иһинээҕи “Герой Егоров” уулуссатын суолун оҥоруу үлэтин ыыттыбыт. Бу иннинээҕи сылларга нэһилиэк олохтоохторун көҕүлээһиннэрин өйүүр программаҕа (ППМИ) отопление турбатын ылыыга үстэ кыайбыппыт. Үлэлээбиппит тухары бу программаҕа уопсайа 7 төгүл кыайан, нэһилиэкпитин тупсарар үлэни ыытан кэллибит. Ол курдук сайыҥҥы уу турбатын холботуу, спортивнай площадкаҕа бетон кутуутун үлэтэ, Кыайыы болуоссатын саҥардыы – бу барыта ППМИ нөҥүө оҥоһуллубута.
– Сайын устата төһө от оттонно? Төһө сүөһү, сылгы кыстаары турарый?
– Быйылгы от былааны толору кыайбатыбыт. Ол да буоллар хаһаайыстыбалаах ыалларбыт кыстыыр отторун булунан олороллор. Нэһилиэкпит үрдүнэн уопсайа 1175 ынах сүөһү, 879 сылгы кыстаары турар.
– Онтон котельнайбыт тутуута төһөлөстө?
– Кэккэ үлэлэр билигин да бара тураллар эрээри кыстыгы туоруурга котельнайбыт бэлэм. Бүгүҥҥү күҥҥэ биһиги иннибитигэр турар саамай улахан сыалбыт-сорукпут – нэһилиэги 100% сылааһынан хааччыйыы. Билиҥҥи туругунан, 42 ыал сылааска холбонон олорор.
– Савва Иванович, быйыл сайын биир дойдулаахпытын, Арассыыйа Геройа Алексей Михайлович Неустроевы кытта Саха Өрөспүүбүлүкэтин Ил Дарханын Айсен Сергеевич Николаевы кытта көрсүбүккүт. Ол түмүгүнэн туох быһаарыллар буолла?
– Бу көрсүһүүгэ нэһилиэкпит сайдыытын боппуруоһунан кэпсэтии буолбута. Айсен Сергеевич Танда нэһилиэгиттэн үүнэн тахсыбыт түөрт Герой хорсун быһыыта бүтүн дойду историятыгар улахан суолталааҕын бэлиэтээбитэ. Саамай сүрүн боппуруоспутугар – спортсаалабыт тутуутугар – Ил Дархаммыт өттүттэн өйөбүлү ылбыппыт.
– Савва Иванович, интервьюгут иһин улахан махтал! Нэһилиэк олоҕун-дьаһаҕын тупсарыыга ыытар үлэҕит силигин ситэн, олоххо киириэ диэн эрэнэбит. Биһиги нэһилиэкпит биһиги кэскилбит буолар.
Снежанна ГОТОВЦЕВА, IX кылаас,
“Байаҕантай кэскиллэрэ” медиа киин эдэр кэрэспэдьиэнэ,
М.Н. Готовцев аатынан Танда орто оскуолата, Уус Алдан