Дьокуускай куорат 17 №-дээх оскуолатын «Талбан» диэн сахалыы ааттаах 4 «Г» кылааһын үөрэнээччилэрэ кинигэ таһаардылар. Кырачааннар бу бэртээхэй бырайыактара күн сирин көрбүтүн бэлиэтээтилэр. «Айымньылаах аартыгынан» кинигэ «Чуораанчык» сурунаал эрэдээксийэтин көҕүлээһининэн таҕыста.
Бу күннэргэ Дьокуускай куорат 17 №-дээх оскуолатыгар саҥа кинигэ «сүрэхтэниитэ» буолан ааста. Алын кылаас учуутала Сааскылаана Керемясова уонна кини үөрэтэр, сахалыы «Талбан» диэн ааттаах 4 «Г» кылааһын үөрэнээччилэрэ «Айымньылаах аартыгынан» диэн кинигэни бэчээттэтэн таһаардылар. Кинигэ «Чуораанчык» сурунаал библиотеката» диэн 1992 сыллаахха олохтоммут серия иһинэн бэчээттэнэн күн сирин көрдө.
— Дьокуускай куоракка сахалыы тыллаах кылаастар арыллыбыттара быйыл 17-с сыла. Куорат оскуолатын учууталлара түмсэн, оҕону сахалыы тылынан үөрэтэр, төрөөбүт тылыгар умсугутар сыаллаах үлэ араас хайысхатын торумнаабыппыт. Саҥа сонун бырайыактар, куонкурустар баар буолбуттара. Үлэбит былаана, хайысхата кэҥээбитэ. Оҕо кинигэни, өс хоһооннору ааҕан баран, ону хайдах ылыммытын уруһуйдаан, суруйан, кылааһынан бөлөхтөргө арахсан, дьиэ кэргэнин кытта бэйэтин илиитинэн кинигэни оҥорон таһаарар үлэни биһиги күүскэ туһаммыппыт. Ол үлэ түмүгэр «Айымньылаах аартыгынан» кинигэбит күн сирин көрдө, — диэн кэпсиир талан ылбыт тапталлаах идэтинэн 33-с сылын учууталлыыр Сааскылаана Петровна.
Учуутал үөрэнээччини, төрөппүтү кытта ыытан кэлбит үс сыллаах үлэтин түмэн, «Саха народнай бэйиэтэ Бүөтүр Тобуруокап айымньыларынан таайбараҥнар», «Көтөр кынатыҥ — үтүө майгыҥ» өс хоһооннорунан уруһуйдар, «Ким доҕордоох — ол дьоллоох» диэн ааттаах бэйэ илиитинэн үс кинигэни оҥорон таһаарбыттара. Бу үлэлэрин оҕо сурунаалларын редакцията ыытар «Бэйэ илиитинэн кинигэни оҥоруу» куонкуруһугар тиксэрбиттэрэ. Дьүүллүүр сүбэ үрдүктүк сыаналаабыта. Кыаллар буоллаҕына, үһүөннэрин түмэн, биир кинигэ гынан таһаарар баҕа санаа үөскээбитэ. Кылаас салайааччыта Сааскылаана Петровна, төрөппүттэр өйөөн, оҕолор үлэлэрин «Айымньылаах аартыгынан» диэн биир кинигэҕэ түмтүлэр.
Оҕолорго анаан элбэх айымньылары суруйан хаалларбыт саха народнай бэйиэтэ Бүөтүр Тобуруокап бииргэ төрөөбүт быраата, лингвист учуонай, литератураны ырытааччы, филологическай наука доктора, профессор Николай Тобуроков IV «Г» кылаас үөрэнээччилэрэ суруйааччы айымньыларынан таайбараҥ оҥорон киэҥ эйгэҕэ таһаарбыттарыттан «сүрэҕим үөрдэ, сүргэм көтөҕүлүннэ» диэн олус астыммытын туһунан кинигэҕэ анаан суруйбута. Аныгы саха оҕотун сонун толкуйа, аныгы кэм учууталын үөрэтэр ньыматын биир көрүҥэ диэн үрдүктүк сыаналаабыта.
Кинигэ «сүрэхтэниитигэр» народнай бэйиэт Бүөтүр Тобуруокап төрөппүт кыыһа Любовь Петровна Тобурокова ыалдьыттаата. «Дьокуускай куорат киинигэр турар оскуола үөрэнээччилэрэ сахалыы саҥаралларыттан, ааҕалларыттан соһуйдум, ордук үөрдүм. Аныгы кэм оҕолоругар Бүөтүр Тобуруокап айымньыларын үөрэтэр учууталларга, төрөппүттэргэ махтанабын»,— диэн эттэ.
Оҕолор үлэлэригэр ураты болҕомтотун ууран, бу кинигэ тахсыытыгар тылын-өһүн тиэрдэн көмөлөспүт киһибитинэн саха народнай суруйааччыта Сэмэн Тумат буолар. Кинигэ «сүрэхтэниитигэр» ыалдьыттаан, оҕолорго ыллыктаах санаатын тиэртэ: «Төрдүс кылааска кинигэлэммит дьон, ситиһиилээх дьон буола улаатыҥ, кэскилгит киэҥ буоллун!».
Республикатааҕы национальнай бибилэтиэкэ булгуччулаах докумуоннар салаатын сэбиэдиссэйэ Сардана Захарова «Айымньылаах аартыгынан» кинигэ бибилэтиэкэ фондатыгар киирбитин, ону туоһулуур «аптаах сыыппаралар» туһунан кэпсээтэ.
Бу күн С.П. Керемясоваҕа, 4 «Г кылаас үөрнэээччилэригэр, кинигэни таһаарыыга үлэлэспит «Чуораанчык», «Колокольчик» сурунааллар эрэдээксийэлэрин кэлэктиибигэр үтүө тылларын 17 №-дээх оскуола директорын үөрэх чааһыгар солбуйааччы М.Н. Варламова, алын кылаас учууталларын холбоһуктара, кылаас төрөппүттэрэ эттилэр.
— Биһиги оскуолабыт «Чуораанчык» уонна «Колокольчик» сурунааллары кытта бииргэ үлэлээһиммит сылын аайы бөҕөргөөн истин. Биһиги оскуолабыт учууталларын үлэлэрин, уопуттарын тарҕатар, кэпсиир саҥа кинигэлэр бэчээттэнэн тахсан истиннэр, — диэн оскуола педагог-бибилэтиэкэрэ Полина Алексеевна Сивцева кинигэ «сүрэхтэниитин» түмүктээтэ.
Ааптар: Сардаана МАТВЕЕВА